Tengo dicho en dalgún post anterior que, cuando un autor me presta, avezo a lleer de siguío otros llibros d’elli saltando penriba de los otros probes que tán en llista d’espera. Esti ye’l casu, por exemplu, de Sergio del Molino del que reseñé va pocu tiempu la novela «La hija», que cinca a la vida de Rosario Weiss supuesta fía de don Francisco de Goya y Lucientes y del que reseño hoi esta otra, anterior nel tiempu, que lleva por títulu «Los alemanes».
«Los alemanes» ta basada, a lo que paez, nun fechu real pero poco conocíu. Nel añu 1916, en plena Gran Guerra (suel llamase asina a la Primera Guerra Mundial, de 1914 a 1918), los aliaos espulsaron de Camerún onde taben como colonos, a un grupu d’unos seiscientos alemanes que, en llugar de presentar batalla, escaparon corriendo a entregase na Guinea Española que d’aquella yera un país neutral. Treslladaos a la península, un grupu grande d’ellos afíncose en Zaragoza onde vivieron ellí la so vida futura, ellos y los sos descendientes.
De la vida de dalgunos d’ellos -de los descendendientes- trata esta novela centrada na familia Schuster, bisnietos d’aquellos primitivos «pioneros» de los que saben dalgo, pero non lo suficiente, porque dalgunos d’ellos trayíen consigo unos cuantos secretos que, como’l tiempu tien les manes mui llargues, van a alcanzar a los sos descendientes ena vida que tán desendolcando n’actualidá.
Padre y madre y tres hermanos (Gabi, Eva y Fede) son los restos de la familia Schuster que supo arriquecese con una fábrica de salchiches y unes cuantes inversiones afortunaes, anque nel momentu presente la cosa ta dando en baxo. Gabi, el mayor, homosexual, músicu y faranduleru na realidá yá ta muertu y al so entierru acuden los otros dos hermanos: Eva, muyer fuerte ya intelixente, que ta empezando la so carrera política onde se-y presenta un gran futuru y Fede, intelectual, que ta de Profesor de Filosofía en Ratisbona onde ta bien afitáu anque ye persona poco ambiciosa.
Y ye nesi contestu onde apaecen unos millonarios xudíos que quieren comprar (y de fechu compren) al Real Zaragoza Club de Fútbol, cola vista puesta en dar un gran pelotazu urbanísticu casu de que l’ayuntamientu, del que forma parte Eva Schuster, apruebe un nuevu Plan Urbanísticu. ¿Suénanos dalgo, non? El casu ye que la novela da un cucurrabucu y camúdase nuna historia d’intriga onde ye perimportante saber el pasáu de los Schuster. Un pasáu familiar, del qu’ellos poco sabíen, en tiempu de los nazis.
Trátase, pues, d’una historia mui interesante na que se planteguen diverses hipótesis como, hasta que puntu los fíos tienen que pagar polos fechos de sos padres o güelos, y la obligación qu’ellos puen tener a la hora de redimilos. Del Molino traza perbién a los personaxes, que van teniendo que tomar postura frente a una realidá que ta a piques de remover, nun solo les sos creyencies, sinón tamién la comodidá de la so vida actual. Novela mui actual, pola so temática y polos temes universales que plantega. Mui recomendable.
