Títulu: La princesa de hielo
Autor: Camilla Lackberg
Torna: Carmen Montes Cano
Editorial: Maeva Ediciones
Añu: 2004
NOVELA NEGRA CON VISTÍU BLANCU.- Tán dafechamente de moda los/les escritores nórdicos qu’escriben novela negra, como si’l talentu o la capacidá de fabular pudiere dalo una determinada nacionalidá. Nun ye asina, claro, pero tal lo paez pola cantidá d’autores suecos, noruegos, finlandeses o islandeses que cuenten unes ingrientes histories de crímenes, la mayoría mui abegosos, col telón de fondu blancu de la nieve y el xelu de los sos países. Yo tuvi engancháu a la serie de noveles del Inspector Wallander, del mio almiráu Henning Mankell, espléndidu autor que tien otros munchos llibros de xéneros mui estremaos, dalgunos que se desendolquen n’África, país nel que vivía hasta va poco. Tamién me prestó, anque d’otru mou, la triloxía de Millenium del malográu Stieg Larsson, si bien n’orde descendente d’interés del primer volume al últimu. Y yá mui lloñe d’ellos, entretúvome ensin más, una novelina d’Asa Larsson (nada que ver col otru) cuyu títulu creo que yera “Aurora Boreal” o dalgo asemeyao.
Camilla Lackberg ye sueca, como Mankell, pero dista muncho de tener la calidá lliteraria del so antecesor y maestru. Esta novela que comento –La princesa de hielo- ye la so primer obra y, a lo que dicen los editores, fue tal l’ésitu algamáu que-y encartió pa dedicase yá dafechu a la lliteratura: ¡qué suerte! Porque “La princesa…” ye una novelina que se llee con agradu, que nun ta mal escrita y que, inclusive, tien momentos mui afortunaos, pero llueu piérdese en truculencies y llugares comunes, supongo que pa dar más interés al argumentu, pero que quiciás hubiere que dosificar un poco. Asina, hai na novela crímenes, claro, pero tamién suicidios, dalguna violación, y dellos casos de pederastia. Nun ta mal pa un llibru de doscientes y poco páxines. Y en cuantes a los llugares comunes, eso que yá te suena a masuñao y que tas rezando pa que nun te lo vuelvan a repitir, queda retratao nel consabíu trucu de lleer un textu escritu nun papel, que quedó marcáu na fueya d’abaxo, pasando-y un llapiz penriba. Efeutu que yá vimos en milenta películes y otres tantes noveles. ¡Home, hai que ser más orixinal…! sobre too cuando eso va a ser la pista principal pa destapecer un de los crímenes.
Queda dicho, pues, que la novela tien lluces y solombres, que pue lleese con entretenimientu, pero que tampoco nun aporta munches calidaes a un xéneru que tien yá dellos llistones muncho más altos. Habrá que ver si doña Camilla meyoró en sucesives entregues.
