Esi ye’l títulu d’una guapísima película qu’echaron esti día nel programa “El cine de la Dos”. Un programa que nos ta dando, yá dende va tiempu, unes películes interesantísimes de mui variaos temes y nacionalidaes, lloñe d’eses cintes de Hollywood infumables, autorizaes namás pa mozos poco esixentes.
“Tierra de ángeles” ye una película sueca que cunta la historia d’un famosu direutor d’orquesta, con un ritmu de conciertos y, poro, de vida, alloriantes. Hasta qu’un día’l corazón diz que “abasta” y péga-y un avisu cuasi definitivu. Tien que dexar la so actividá y torna al pequeñu pueblu del que coló, con so madre, cuando tenía siete años. Ellí, anque yá nun conoz a naide, pasa a dirixir el coru de la ilesia, formáu por un grupu variopintu de xente. Pero aquello, amás d’un coru, termina siendo una clas de terapia de grupu onde caún principia a soltase, a relaxase, a echar fuera los traumes que toos llevamos a recostín produciéndose escenes, cuando simpátiques, cuando dramátiques, que faen que l’espectador tome partíu y s’enterneza.
La película toca, entós, temes tan duros como la violencia de xéneru, onde destaca’l silenciu de la comunidá pa con él. Los amores reprimíos o silenciaos. Los neños qu’abusen d’otros neños. Los que se mienten asina mesmos mentanto xulguen a los demás (formidable’l papel del cura del pueblu) y la capacidá d’amar que toos llevamos dientro y que, dacuando, nun sabemos espresar
El grupu d’actores ye xenial, desconocíos dafechu, talamente paez que nun tán interpretando, que son xente de carne y güesu salíos del remotu pueblu del norte de Suecia onde se desendolca l’aición. Y la rellación ente ellos y col direutor ye un cantu a l’amistá, al compañerismu, anque pa ello tienen que superar les envidies y los egoísmos.
Nun sé si la película podrá vese neso de Televisión a la Carta, o habrá dalgún mou de repitila, pero si podéis vela, nun la perder. Toi seguru de que naide quedará indiferente delantre d’ella.
