Lleo con incredulidá una recatafila d’allabancies al rodiu de la última medio-novela de l’afamada escritora Rosa Montero. Y digo medio-novela pues ta fecha a cuatro manes, a medies con un escritor francés de nome Olivier Truc al que tamién xuben a los cielos lliterarios como’l más altu referente del «noir» francés. Serálo. Vamos, pues, a da-yos la metada pa caún. Y a esi recursu, que ye un fechu lliterariu bastante corriente -lo d’escribir una novela a cuatro manes- llámenlo un gran «esperimentu». Pues val. Nun sé entós qué será lo de «Carmen Mola» que ta escrito a seis manes.
Al modestu escribidor que firma esta entrada, o seya a min, «La desconocida» paeció-y un mui floxu rellatu enllenu de tópicos y que da la impresión de tenelo lleído una montonera de veces enantes. Y amás muncho meyor. Lo de la perda la memoria que va recuperándose cuando más convién, los policíes corruptos qu’investiguen, el tema de la trata de blanques, y tola parafernalia del xéneru nun presenta nin un rispiu de novedá a la que podamos garranos pa salvar a l’autora. O a los autores. Paezme probe hasta el númberu de personaxes qu’apaecen, tres o cuatro, colo que ye abondo fácil aldovinar quién ye’l malu malísimu de turnu. Pa más «inri» esta Montero tira pol camín de la otra Montero colocándonos un final que supongo que quier ser feminista, pero que ta ensin trabayar a lo llargo tol argumentu.
En fin, como tengo unos bonos recuerdos d’otres noveles de Rosa Montero nun voi afondar más nel tema. Sicasí añadir que, nesti casu, la «desconocida» resultó que yera ella.
NOTA.- Como siempres hai qu’exemplificar, acabo lleer un maraviosu rellatu «noir» (ésti sí) tituláu «Código 101», nel llibru de cuentos «Rotos» del mui interesante Don Winslow. Podría ser un bon modelu p’averase al xéneru.
