close
Eso sí ye periodismu

Eso sí ye periodismu

2016-04-15429Visitas

Papelos de Panamá«Yo nun lo sabía». «Yo pasaba perellí». «Abrióla dalguién nel mio nome». «Sí, abrila pero  zarrela en siguida»… Éstes son dalgunes de les pintoresques rempuestes de los implicaos nos yá famosos «papelos de Panamá». Una parte mui pequeña -pese al so tamañu- de les grandes trames y les grandes firmes implicaes en paraísos fiscales. Una sangría pola cuál miles de millones d’euros se furten a les faciendes públiques de numberosos estaos. Toos teníemos conciencia de lo que pasaba, pero nin conocíemos les cifres, nin a  los sos responsables. Esos homes y muyeres, eses empreses que, con aspeutu d’honorabilidá, tán tolos díes nos medios públicos y, munches veces, dándonos lleiciones d’ética y moral.

Pero nun ye esto de lo que me prestaría falar güei, tema del qu’otros saben más y que ta enllenando les televisiones del país. Lo que querría destacar ye qu’estes informaciones nun salen d’un «puntu» que, por despechu o mala llechi acumulada, filtróles a la prensa, sinón de dalgo mui serio que se llama Consorciu Internacional de Periodistes d’Investigación (ICIJ poles sigles n’inglés). Un piñu de periodistes de verdá, na menos que de 60 paises, qu’en llugar de dedicase a manipular a la opinión pública, nuna defensa patrimonial de los sos intereses empresariales, dedíquense a destapar too eso que fiede tan mal y delantre lo cuál la xente «de a pie» tamos desarmaos. Y ye qu’ún siéntese indefensu ante toles trampes inventaes pol sistema capitalista pa que los que más tienen, les grandes fortunes y los aspirantes a tal, se camuflen a los nuestros güeyos y nos roben del total d’aportaciones del estáu la so parte. Precisamente la que tenía de ser la más sustanciosa. Ello fai que’l restu, tengamos que poner por cuenta d’ellos pa los gastos de sanidá, d’educación, de servicios sociales, de carreteres…

Agora, frente a esi periodismu cada día más ranciu y más amariellista, surde esti otru periodismu que  caltién les
esencies de la profesión, lo que dio orixe y sentíu a un serviciu públicu: informar con honradez, facer opinión, acuartar a los otros poderes, criticar los abusos…  Y nesa xera hai medios tan importantes como The Guardian, The Washington Post, la BBC, Le Monde, la televisión pública canadiense, diarios alemanes… y dalgunos españoles, como la Sexta y el periódicu dixital El Confidencial. Curiosamente nun s’alcuentra ente ellos El País, el de mayor tirada n’España y que ca día ta más facha.

Bienveníu, pues, esti consorciu internacional de periodistes que sigue investigando, ente más de 170 paises, los negocios tapecíos de políticos, estafadores y grandes fortunes de tol mundu. Que cada vuelta seya más dificil operar dende estos paraísos fiscales y que los que lo faigan seyan denunciaos y nun tengan cuartel.