Nun conocía’l contestu nel qu’una señora conceyala de cultura (!) n’Avilés faló d’esi famosu «apartheid» en favor de los qu’escribimos n’asturianu. Yá la cosa de por sí préstase muncho a la coña, porque ye como eso de que los páxaros disparen a les escopetes: el mundu al revés. Unes persones, ente les que me cuento, dafechamente marxinaos de los circuitos normales del restu del Estáu, al puntu de que, por nun ser oficial la nuestra llingua, nun podremos nunca algamar, por exemplu, el Premiu Nacional de Lliteratura, al que si acceden -y ganen- escritores n’otres llingües. Por citar un solu casu de despreciu. Pero ye que, amás, la entruga y el comentariu de Xune Elipe fue de lo más correuto. Quería saber por qué, unes entidaes que trabayen nuna población asturiana y que cuenten con subvenciones oficiales, nunca nun llamen a participar a escritores en llingua asturiana habiendo, como hai, dalgunos que tienen méritos sobraos pa ello. El citame a min, en concreto, nun facía falta porque, de xuro, habrálos con más merecimientos, anque-y agradezo’l detalle.
La rempuesta de la señora conceyala de cultura (!) nun tien per ónde la garrar y abúltame que debiere presentar la dimisión d’un cargu que s’executa n’Asturies y non en Torrelodones o Aldeadávila de la Ribera. En cualquier casu hai una derivación del tema que, polo menos yo, nun toi dispuestu a aceptar. Y ye que se nos meta a los escritores n’asturianu como una minoría a la qu’hai que discriminar positivamente. Como si fuéremos un coleutivu marxinal como les muyeres maltrataes o les persones con dificultaes de movilidá. Niégome a ello, prefiero nun intervenir, pero nun quiero ser un númberu paritariu, una cuota de xéneru o como quiera que se llame eso de que te metan nuna llista por ser dalgo: muyer, minusválidu, inmigrante o minoría étnica. Si me llamen de dalgún llau que seya polos mios merecimientos propios, non por ser d’un coleutivu marxinal, anque de fechu lo seya. Pero, d’igual mou, tampoco nun quiero que se me marxine más de lo que yá toi, por pertenecer a esi mesmu coleutivu, que ye lo que ta pasando agora, onde cualquier pelamangos que vien de fuera tien más predicamentu que munchos espléndidos escritores que tenemos ente nos. Y ye que nun hai que lleer a Xovellanos pa saber que munchos asturianos, ente ellos dalgunes conceyales de cultura (!) son estranxeros nel so propiu país.
