Maricela Guerrero ye una d’esa xeneración d’importantes escritores latinoamericanes que tán llegando agora a España un poco con cuentagotes. Nacida en Ciudá de México nel añu 1977, fue hasta agora una mui valoratible poeta con una decena poemarios y participación en numberoses antoloxíes. Y digo «hasta agora», porque ta acabante salir a les llibreríes la so primer esperiencia como narradora: la novela «Bronce dorado». Una novela que podríemos definir como esperimental, si esti términu nun tuviere yá un poco devaluáu. Nada nun tien que ver lo que nos cuenta (maraviyosamente) Maricela con eses otres obres escrites por autores que busquen «epatar» a base d’escribir nuna xiriga que malpenes si s’entiende. O con innovaciones que nun son tal, como escribir ensin puntuación o xugar, a estes altures de la película, a facer una novela de realismu máxicu onde se cuenten histories vieyes con envoltoriu nuevu. En fin.
«Bronce dorado» cuenta un cachín de la vida d’una adolescente llamada Maura, que va a la secundaria d’un institutu públicu, y ellí llucha por dir faciéndose persona y, sobre too, muyer, anque ella nun sepa mui bien lo que ye eso. A Maura too-y interesa, dende’l calentamientu global hasta la bomba atómica, lo que pasa que dacuando mecia tolo que lleva nel maxín y tiende a desmoralizase y a sobrepasase. Nello influye que so padre marchare de casa va un tiempu y la madre nun sabe mui bien cómo la tratar.
A Maura vien-y la regla un día tando en clas y marcha, con un poco de vergoña, a los llavabos a ver si puede llimpiar esa mancha y esa sangre que llegó ensin avisar, pero la verdá ye que nun s’arregla bien. Tien la suerte de qu’una compañera d’otra clas, Rudra, vien na so ayuda y nun sólo-y soluciona’l problema, sinón que, amás, Maura queda dafechamente namorada d’ella. Como cualquier namorada primeriza, la cosa nun va muncho más allá, pero sírve-y pa entamar a escribir, na soledá del so cuartu, unos cuadernos onde va cuntándo-y a Rudra tolo que-y pasa, tolo que piensa, los sos proyeutos de vida, cola idea de que, igual un día, ella pudiere lleelos.
Resultóme mui prestosa la forma en que la Guerrero cuenta la historia; la de Maura, la del institutu y la de la propia sociedá mexicana de los años noventa del sieglu pasáu. Una forma xuvenil, enllena de tics, de repeticiones de frases y pallabres, de modismos, de mexicanismos, pero con una gran fondura en tolo que nos cuenta. Dacuando fáite reir, y siempre te fai pensar porque la mocina camienta que tien qu’haber otru mou de facer les coses. Que nun ta bien la rellación qu’hai ente padres y fíos, que nun ta bien la rellación ente profes y alumnos, nin ente unos paises y otros, nin la manera de tratar a la ñaturaleza. Tien d’haber otru mou. Siempre tien d’haber otru mou. Y habrá que dir atopándolu.
Trátase, en fin, d’una novelina curtia, simpática, que se llee con interés y qu’amuesa que Maricela Guerrero ye, amás de mui bona poeta, una estupenda narradora. Que siga per esi camín, ye lo que yo-y deseo.
