Anque la Segunda Guerra Mundial ye un de los fechos históricos más trataos nel cine y la lliteratura, siempres hai aportaciones nueves d’interés que vienen a refrescanos o, nel so casu, a ilustranos, sobre detalles más o menos importantes ya igual nun demasiao conocíos. La novela de Robert Harris “Munich” cuéntanos les interioridaes d’aquel tratáu llamáu «El pacto de Munich», pol cual les grandes potencies del momentu (Alemania, Inglaterra, Italia y Francia) accedíen a la entrega a Alemania de la parte de Checoslovaquia llamada “los Sudetes”, una estaya de mayoría xermana que Hitler quería incorporar a los sos planes de “la gran Alemania”.
Como, lóxicamente, los checos nun queríen desprendese d’ella, el gran caudillo nazi yá tenía les tropes preparaes xunto a la frontera p’aniciar la invasión en cualquier momentu.
El “Pactu de Munich” yera l’últimu intentu de solucionar el conflictu ensin entamar una guerra europea, pues Francia tenía un alcuerdu de mutua ayuda colos checos, polo que si yeren atacaos, tenía d’entrar en guerra na so defensa y, al mesmu tiempu, Inglaterra tenía dalgo asemeyao pautao colos franceses. Asina que la invasión de los Sudetes y la espulsión de los non alemanes de la zona, suponía dafechu l’entamu d’una guerra de consecuencias terribles pal continente européu, onde millones de persones diben morrer talo qu’asocediere na Primera Guerra Mundial vente años enantes.
El primer ministru inglés Neville Chamberlain y el francés Daladier, pidieron la mediación de Mussolini pa cellebrar una reunión cola sida de tratar d’iguar el problema ensin la presencia de les armes. Y ello fue lo que se trató en Munich y de lo que trata la novela de Robert Harris.
Ye una novela perinteresante, lo mesmo pal que conoza los fechos como palos “legos” na materia, porque ta contada en tiempu presente y tal paez que pudieren cambiase los socesos que llueu ocurrieron. Supón una especie de llucha escontra’l reló pa llograr que Hitler suspendiere, o polo menos aplazare la inmediata invasión, y con ello la guerra. En tolos paises afeutaos pol conflictu había un mieu cerval a qu’esto asocediere y toos esperaben col corazón nun puñu’l resultáu de la conferencia.
Pero ye que, amás, Harris, que mueve los personaxes reales con maestría, xuega equí con otros elementos ficticios qu’introduz nel argumentu pa da-y un mayor interés y dinamismu. Asina pasa cola presencia de dos antiguos amigos, un inglés y otru alemán, qu’estudiaron xuntos n’Oxford y qu’agora traten d’evitar la catástrofe, caún dende les files del so propiu país. L’inglés va na comisión qu’acompanga a Chamberlain, xunto con otros políticos, y l’alemán ta metíu nun complot escontra Hitler pa secuestralu y anulalu. Pero ellos va años que nun se ven y nin siquier sabe un del otru.
Con toes estes blimes l’autor británicu compón una novela mui prestosa, na que tamién inclui otros temes más personales qu’ayuden a conocer meyor a los personaxes. Ye d’eses noveles que puen lleese “de tirón” porque, como sabemos, Harris siempre interesa.
