En dalguna ocasión comenté l’interés que tien lleer a autores de nacionalidaes llonxanes. Calumbaos nes lliteratures más prósimes, los mundos que se ven espeyaos nes sos obres son cuasi siempre conocíos, familiares, por más que la trama que se nos cuente seya interesante. Por en cambiu, eses otres lliteratures que vienen de más lloñe, de llugares que, inclusive, podemos denomar como «esóticos», aporten siempres ambientes, histories y sensibilidaes estremaos de los nuestros, lo cual tampoco nun quier dicir que, poro, seyan meyores, sinón cenciellamente distintos.
Lleo agora una novela d’una escritora malaya que lleva por títulu «La tormenta que desatamos». L’autora llámase Vanessa Chan y ésta (que yo sepa) ye la so primer novela. Cosa que me produz gran plasmu pues el manexu que fai de lo que cuenta tien una maestría impropia d’una primera obra, con una fondura, nos personaxes que retrata, digna d’una de les grandes escritores contemporanies. Tamién ayuda una guapísima torna del inglés que -pienso- recueye perbién el sentíu de l’autora.
La historia cuenta dos situaciones del país (Malasia, primero llamada Malaya) separtaes por nueve años. La primera en 1936, embaxo dominiu colonial inglés, y la segunda en 1945, cuando los xaponeses, a puntu de perder la guerra, exercíen un mandatu dictatorial sobre la población malasia. Ente esos dos momentos históricos, asocede la historia d’una familia que va protagonizar los acontecimientos. La madre, Cecily, ye una muyer inquieta ya intelixente que nun se conforma con ser «la esposa de», nesti casu un funcionariu llocal con un ciertu mandu, pero siempres domináu polos poderes coloniales. Primero ingleses y llueu xaponeses. Esa inquietú va llevar a Cecily a posicionase escontra los ingleses y favorecer la llegada de los xaponeses, engañada porque creyía qu’estos diben trayer la llibertá pal so pueblu. Pero too esto ye namás la superficie de la trama, porque les pasiones que se van produciendo nel interior de la familia, acordies colos cambeos políticos que se van dando, son el verdaderu fondu de la novela. Van alternando capítulos protagonizaos por caún de los miembros de la familia, y nellos Vanessa Chan ye a perfilar la so personalidá con una finura y una dureza envidiables. Porque ye verdá que la novela ye mui dura, anque tien momentos d’amor y confidencies. Los tres fíos resulten unos personaxes mui interesantes, anque’l varón ye’l que peor paráu sal de los acontecimientos. La última parte de la historia (que creo que tien bastante de vivencies personales) ye especialmente emocionante.
En fin, que me prestó muncho lleer a esta autora que vien d’una parte del mundu poco conocíu (polo menos por min) y que nos trai una novela maraviosamente escrita y enllena de fuercia narrativa y argumental. Tou un descubrimientu.
