“El hombre es un dios en ruinas”. Con esta prestosa cita abre la escritora inglesa Kate Atkinson la so novela, que supón un cambiu temáticu colo que yo conocía d’ella. Les dos noveles anteriores que lleí, “La mecanógrafa” y “Expedientes”, raspiaben un poco xéneros más convencionales. La primera enmarcada nes histories d’espíes, y la segunda nesi sacu ensin fondu que ye la novela policial, a la que la gran escritora inglesa amiesta un nuevu personaxe llueu utilizáu n’otres ocasiones.
Un dios en ruines trata la historia d’una familia a lo llargo práuticamente de tol sieglu XX. Padres, fíos y nietos, pero tamién hermanos, tíos, etc. faciendo un finxu especial na terrible Segunda Guerra Mundial que ye l’escenariu qu’endolca tola historia familiar.Ye, pues, una especie de novela ríu qu’esboliga, dacuando con humor, dacuando con drama, y siempre con señaldá.
La guapísima prosa de Kate Atkinson esmenuza, un por un, la personalidá de tolos miembros familiares al puntu qu’al final yá formen parte de la to propia familia, o tu de la d’ellos. El personaxe clave, sobre’l que xiren tolos demás ye Edward Todd, Teddy, qu’apaez ocupando nel tiempu los distintos papeles de fíu, padre y güelu, y siendo’l que xuega un papel cimeru nes acciones de la guerra. Al mandu d’un bombarderu Halifax, el rapaz (d’aquella yera un rapaz) tuvo d’enfrentase al fuegu antiaeriu alemán con otros rapazos como él que formaben la tripulación. Asina, l’autora espón con crudeza los horrores de la guerra, colos bombardeos de ciudaes alemanes y numberoses víctimes civiles, que nun se sabe mui bien si yeren necesaries pal final de la guerra o constituyíen una especie de revancha poles atrocidaes anteriores de los nazis.
Pero la novela ye muncho más qu’eso, anque sólo con eso ye fuere bastante. Atkinson afonda con ésitu nes rellaciones de pareya, nel tratu ente pás y fíos y, nuna parte que me paeció perguapa, la bona entente ñacía ente Teddy y la so nieta con partes sensibles y señaldoses, como’l viaxe que faen xuntos pa recordar, yá de mayor, los llugares onde’l güelu pasó los sos momentos más emblemáticos.
Gran novela de la gran Kate Atkinson, una escritora a la que nunca nun me canso de lleer.
«Un dios en ruinas»
Kate Atkinson
Lumen
2016
