John-Calum Macleod, fíu de John Macleod, torna al domiciliu familiar depués de la esperiencia universitaria que tuvo en Glasgow onde cursó estudios de diseñu de moda. El so pasu pola escuela textil nun solucionó los sos problemes, nin personales nin llaborales que Cal (como toos lu llamen) arrastriaba, asina que, aprovechando que so padre-y comunica que la güela ta amalicada, aprovecha pa volver a la tierra que lu vio ñacer y de la que coló cola esperanza d’una vida meyor. Y nun yera mui díficil de llograr, a la vista la probitú del orixe que tuvo y a onde vuelve agora, porque la vida que Harris-y ufiertaba nun yera nada prestosa.
Esclariemos yá que Harris ye una de les islles del archipiélagu de les Hébrides, que pertenez a Escocia, nel oceanu Atlánticu. Unes islles nun estáu primitivu, de tierra rocosa, erma, onde la vida ye perdifícil y hai namás un poco ganadería, pesca y una fábrica textil pa la que trabayen munchos de los sos habitantes. Unos habitantes, que siguen conservando el «gaélico» de los sos antepasaos, y que ven pasar el tiempu, de padres a fíos, ensin nengún cambiu que los faiga meyorar. Un par de chigres, una ilesia con un párrocu evanxelista rigurosu, que-yos mete mieu col pecáu y la muerte, y una vida «intramuros» dientro d’unes caseríes con tou tipu de carencies y falta comodidaes.
Cal vuelve ehí, refugando la oportunidá que tuvo de colar y abandonar esa rutina aprobetayada, pero dalgo quedó n’elli del contautu cola «civilización»: El pelo llargo, los jeans axustaos… coses que nin a so padre, estrictu relixosu, nin al restu la comunidá-yos presten muncho. Pero, embaxo d’esi aparente inmovilismu, hai unes pasiones escondíes, unes pulsiones que lluchen por surdir y que surden cola fuerza d’esi vientu qu’asolla dacuando na superficie de la islla. Bien ceo sabemos que Cal ye gay, pero nun ye solo elli el que tien atraición polos homes. Otres histories van desendolcándose al so llau que van a envolvelu nuna espiral de pasiones que nunca nun fuere a pescanciar. Son munchos los secretos qu’esnalen per Harris y que Douglas Stuart, con trazu firme, escarniáu y agudu va desendolcando y amosándonos pasín a pasu hasta algamar un cumal mui altu. D’esi mou, va teyéndose, talo que fain los propios protagonistes de la novela coles sos máquines, una historia complexa, íntima, dramática que nun sabes mui bien cómo pue finar.
Nesti drama rural destaquen, amás de los personaxes del padre y del fíu (John y John-Calum), el de la güela Ella (esi ye’l so nome) un personaxe mui bien llográu que quier mediar ente los dos, y otros secundarios con un papel potente, como Innes, íntimu amigu de John, y la mocina Isla, que tol mundu camentó siempres que diba a casase con Cal, y que xuega un papel detonante nel argumentu. Novela de fuertes pasiones, con un decoráu primitivu más propiu d’époques pasaes, que se llee con interés y que dexa un tastu fondu al final de la historia.
