Nel añu 1988, inauguraba l’Academia de la Llingua Asturiana una nueva coleición xuvenil que llevaba por títulu xenéricu «Lliteratura Xuvenil», y cuyu primer númberu yera, precisamente, esti del que vos falo: «El diariu d’Enol», d’un tal García Oliva, al que conozo de vista. Son, entós, 31 años dende esa data, y tráigolo equí como recordatoriu de la mésma porque, con tola modestia que se pueda dicir, abúltame que fue un finxu importante na LLIX (Lliteratura Infantil y Xuvenil) asturiana. Prestaríame, entós, resaltar dalgunos aspeutos del llibru y desplicar por qué lu consideru un finxu y, sobre too, por qué me siento arguyosu d’elli.
Por primer vez, la familia tradicional representada na LLIX nun ye padre, madre y neños, sinón que’l padre y la madre d’Enol tán separaos, colo qu’él y Mario, so padre, formen una familia monoparental. Per otru llau, so madre vive sola ya independiente y, amás, tien mozu. Too ello fiende, repito, el tipu familia que suel presentase pa los neños y neñes llectores. El personaxe de Concha, la moza que-y presta a Enol, creo que ye, pa esa dómina (ya igual pa ésta tamién) abondo «rompedor», una moza maltratada por so padre, con personalidá mui adulta, gran llectora y, pa con too, que ye cleptómana. Un modelu, vamos dicir, poco convencional. Y abúltame que toes eses interrellaciones familiares y sentimentales que s’apunten, resuélvense con cierta maña, a parte otres aventures que salen na historia.
Y pa finar -last but not least-, con esta novela «bauticé» a toa una xeneración de «Enoles» que nun dexen de medrar a pasos de xigante. N’efeutu, el nome d’Enol, aplicáu a un neñu, inventelu yo nel llibru. Enantes d’él nun había nengún neñu con esi nome. Ye fácil de comprobar, abasta con mirar si hai dalgún Enol anterior a 1988. O seya que tuviera agora más de 31 años. ¿A que non? Bueno, pues por toes eses coses, y dalguna más que se podríen amestar, creo que ye de xusticia que recuerde güei y nesti blogue al mio queríu «Diariu d’Enol». Per munchos años.
Nota.- Al pocu tiempu de colgar esta entrada, avísame’l detective Inaciu Galán de que nel Facebok hai dos rapazos que figuren con esi nome, ñacíos nel 1985 y 1986 respeutivamente. Como hai que suponer que nun tean enquivocaos, nun hai más remediu que sacar la pata d’onde se metió. Vamos dexalo entós en que’l «Diariu d’Enol» lo que fizo fue popularizalo. ¡Gracies, Sherlock!
