Principió a publicase nel añu 1990, o seya que yá orbayó, tronó y xarazó abondes veces. Yera un númberu O nel que se dicía, nel editorial qu’abría les sos páxines, que: «…ñaz col enfotu, esa fonda esperanza cola que surden les revistes lliteraries, de comunicase con homes ya muyeres concretos, anque desconocíos: el públicu llector», y más alantre, «…la realidá lliteraria d’Asturies, valoratible ya complexa, pesie a la situación amenorgada de la llingua, ye’l nuesu referente ya la nuesa vocación…». Agora, un cuartu de sieglu depués, la nuestra llingua sigue tando amenorgada y la lliteratura caltiénse con dificultá al escosar subvenciones (como’l cine, el teatru o la ópera nun puen vivir por sí soles), zarrar editoriales y llibreríes y fallar dafechu la entemediación cultural.
Pesie a too, equí ta Lliteratura con un garapiellu de prestoses collaboraciones que cinquen a casique tolos xéneros: Poesía, narrativa, torna, teatru, entrevista, crítica… firmaes por unos autores yá reconocíos y reconocibles, y otros qu’asomen per primer vegada a les sos páxines. Asina, hai poemes de Xosé Ánxelu Gutiérrez Morán, d’Ángeles Carbajal, d’Elías Veiga, de Nachu Llope, d’Esther Prieto y de M. José Fraga -n’Eonaviego-. Cuentos de Carmen Gómez Ojea (guapísimu), Paquita Suárez Coalla, Xuan Xosé Sánchez Vicente y d’esti que firma. Una entrevista que-y fai Paz Fonticiella al gran Carlos Alba «Cellero». Dos tornes d’obres de Leopoldo Mª Panero (J.L. Campal) y Arthur C. Clarke (Victor Suárez). Dos monólogos, de Cellero ya Inaciu Galán, y una obrina curtia de Xaviel Vilareyo, y pa finar una capítulu de Varia onde figuren un curiosu textu de Henrique G. Facuriella y una crítica de la obra teatru Brokeback Mountain, de Charles Wuorinen, representada nel Teatru Real de Madrid, que fizo’l direutor de la revista Xosé Bolado.
Un númberu, paezme, mui completu, col diseñu y la maquetación de la prestixosa Marina Lobo y les perguapes
semeyes del interior, col títulu xenéricu d’El ruiu, a cargu de José Javier González que yá collaborare cola revista n’otres ocasiones. Hai que dicir que la idea ye que Lliteratura salga una vuelta al añu, al empar del Día de les Lletres. L’Academia nun tien perres p’asoleyar dos revistes, una aquella antigua del Lletres lliterariu que yera la que salía nesa fecha, y otra ésta que comentamos güei. Claro que la filosofía de dambes ye distinta, el Lletres lliterariu pretendía ser un llibru d’homenaxe a la llingua y a la lliteratura asturianes abiertu a tolos que quixeren unviar collaboraciones, con un mínimu de nivel. Cuanta más xente, meyor. Lliteratura nun podría, anque quixere, xugar esi papel, anque namás fuere pola falta espaciu. Pretende, entós, siguiendo’l camín iniciáu hai 25 años, «… ser la voz d’una lliteratura que sigue atenta los ritmos de la so época…», como diz l’editorial d’esti caberu númberu. A ver si, colos fallos que de xuro tendrá, somos a llogralo. Darréu, namás como amuesa, un poema de Xosé Ánxelu Gutierrez Morán inxertáu na revista.
SERONDAYA
Neto que llabios
esquitando un riscar
puru, asina tu
nesti violeta usao
de la lluvia:
qué había de riegu,
qué de semiente
na to voz otra vez
nueva
mientres un bálagu
de fueyes seques
alzaba’l vuelu,
guapísima agonía
que pa min acutó
la vida.
