Tamos delantre d’una biografía escrita pol prolíficu Lorenzo Silva que tien por protagonista al Xeneral Miguel Campins. Nella cuéntase la vida del ilustre soldáu a lo llargo de tolos destinos, aparándose de mou fundamental nos años d’Africa, onde participó de munches de les batalles que se produxeron en tierres del Rif. Eses tierres ocupaes por unes kábiles guerreres y cuyu interés yera escasu, masque por dicir qu’España tamién tenía colonies como los paises grandes (Inglaterra, Francia…) Y ye verdá que les tuvo, pero yá nes feches de les que falamos namás quedaben «les arralladures». Bueno, tamién teníen l’interés de les mines de fierro (Minas del RIF), una sociedá anónima onde teníen capital invertíu parte de la nobleza hispana, dalgunos altos militares… y el propiu Alfonso XIII un de los mayores accionistes. D’ehí que-yos interesare caltener la guerra que costó miles de muertos d’españoles probes. Los ricos pagaben pa nun dir, o pa mandar a otru nel so nome. Campins participó, como digo, en munches d’eses batalles, anque non nel famosu «desastre d’Annual», anque pasó perellí a tiempu de ver tovía a los calabres descomponiéndose al sol.
Polo que nos cuenta Lorenzo Silva, Miguel Campins fue un home cultu, solitariu, de poques pallabres, valiente y cumplidor colos gobiernos a los que sirvió. Mesmo cuando llegó la República, pese a qu’ésta lu quitó del puestu que tenía n’Academia Militar de Zaragoza a les órdenes del Xeneral Franco. La historia que se nos cuenta, de mou cronolóxicu, va siguiendo los pasos d’esti buen esposu y buen padre de familia que, por circunstancies mui especiales, tocó-y tar nel peor sitiu y nel peor momentu. Acababen de nomalu Xeneral en 1936, depués de tener yá munchos merecimientos pa ello, y diéron-y destín un par de díes enantes qu’españase’l golpe d’Estáu militar. Elli nada sabía de la conspiración que se preparaba diba tiempu y nada-y dixeron los que lu mandaron de Gobernador Militar a Granada (Casares Quiroga, de mal recuerdu). Sustituyía a un de los que taba implicáu nel golpe pero, como dicía, nada sabía. Sí lo sabíen los dos capitanes que taben a les sos órdenes, pero tampoco nada-y dixeron porque nun se fiaben d’elli.
Cuando’l llevantamientu trunfó en Sevilla, coles maniobres de Gonzalo Queipo de Llano, ésti lu llamó pa que proclamare l’estáu de guerra, cosa a la que se negó esperando recibir órdenes de los superiores, órdenes contraries a les de los sublevaos. Asina aguantó lo que pudo, tratando de negociar colos rebeldes pero ensin fuerza militar dalguna porque los demás mandos taben yá posicionaos a favor d’ellos. Lo que vieno depués val más que lo lleáis vosotros porque ye d’interés, anque yá sabéis pola historia que terminaron fusilándolu los mesmos compañeros que tuviere n’Africa. El datu curiosu ye que Franco que fuere, primero compañeru y llueu superior suyu nel Rif, escribió dos cartes a Queipo de Llano pa que-y perdonaren la vida y ésti, un de los mayores sinvergüences de la tierra, nun-y fizo nengún casu. Bien ye verdá que Franco tomó nota y pagó-y cola mesma moneda nun casu qu’hubo más alantre.
Un llibru interesante pa conocer a un militar lleal y disciplináu, anque’l rellatu resiéntese un poco de llentitú en dellos pasaxes de los conflictos rifeños. Demasiaes incidencies hasta llegar a Abd del-Krim col que finó la República del Rif y que ralenticen un poco la llectura. Con eso y con too, recomiéndolu.
(1) Escribo kábila d’esta manera y non «cabila» que pon la RAE, pues ye la forma en que se llamó en Xixón a dalgo asemeyao a un pobláu chaboleru no que hoi ye l’Avenida’l Llano.
