Cúmplese esti añu’l 25 aniversariu de la creación de la revista Cultures, publicación de l’Academia de la Llingua que dirixe, dende entós, l’antropólogu y amigu Roberto González-Quevedo. A lo llargo esti tiempu asoleyáronse 19 númberos, yo creo que toos ellos mui interesantes. Asina, hubo monográficos sobre la cultura del pan, el gochu y tolo rellacionao col tema, la pesca, la yerba…, xunto a otros que recoyíen diversos temes al rodiu de la nuestra cultura, vezos y costumes. Caún d’estos 19 llibros ye, en sí mesmu, una pequeña ayalga d’un valir descomanáu, que recueye parte del nuestru ser como país, y que tendremos siempres ehí pa echar mano d’ello cuando de too esto nun s’alcuerde ya naide. Muertos los caberos informantes, y desinteresaes les nueves xeneraciones d’asturianos y los políticos que los gobiernen, habrá que recurrir a publicaciones como ésta y delles otres, pa saber lo qu’un día fue Asturies, la so cultura y la so llingua, tal y como se llamaba aquel espaciu radiofónicu que, nos años setenta del sieglu pasáu, facíemos la xente de Conceyu Bable-Xixón.
Quiero dende equí felicitar al so direutor Roberto González-Quevedo, por ser a llevar alantre, con munches dificultaes, esta interesantísima revista que creo debería tar en toles cases onde hubiere interés por Asturies y el so pueblu. O seya, nosotros mesmos y los nuestros antepasaos. Feliz cumpleaños a Cultures y, como suel dicise nestos casos: «Que cumplas munchos más»
Nota.- Al actu de conmemoración y presentación del últimu númberu, tuvo con toos nosotros el Conseyeru de Cultura y Educación Xenaro Alonso Megido, que dixo unes emotives pallabres y dio anuncia d’importantes decisiones sobre la gaita y la tonada. Como «la otra»…
