Esi ye’l títulu de la conferencia que voi dar esti xueves, día 29, a les 8 de la tarde, nel Club Cultural de La Nueva España en Xixón. El llocal cambió de sitiu y agora ye na Caxa Aforros y Monte de Piedá, na Plaza d’esi nome. L’actu va a presentalu María Xosé Rodríguez, responsable de la Oficina Municipal de la Llingua de Xixón y, sobre too, entrañable amiga dende va munchu tiempu.
García-Rendueles ye un importante intelectual, non abondamente reconocíu, pues cultivó l’ensayu, la crítica, la poesía y la investigación. Pero, lo que ye quiciás ye más importante, too lo fizo dende una perspeutiva asturiana y asturianista. Los ensayos, sobre temes y personaxes d’equí; la crítica, a los poetes que emplegaben la llingua sólo pa coses festives o ensin importancia; la investigación sobre una gramática y un diccionariu del bable y la poesía que cultivó fue n’esa mesma llingua, la nuestra. D’ehí’l títulu de la charra de «un intelectual asturianu».
El xueves, colos que-yos preste apaecer por aquel llocal, repasaremos un migayu la vida y anéudotes de don Enrique y daremos una pequeña revolada pola so obra. Una obra qu’amuesa la voluntá d’un paisano de trabayar pola so tierra. Dende esti modestu blogue, quiero da-y les gracies al amigu Luismi Piñera, que con tantu aciertu dirixe el Club de La Nueva España, por invitame a charrar de toes estes coses. Él tamién ye un bon xixonés y un bon asturianu. Y non por esto, claro.
