Non, nun se trata de dalgo que cinque a la venida del Santu Padre al nuestru pequeñu mundu que, por cierto, lo poco presta pero lo muncho cansa, sinón del últimu llibru de la «allabada» escritora Fleur Jaeggy. Suiza de nacencia, emigró ceo pa Italia onde s’afincó y casó, y tola so obra ta escrita n’italiano, anque tien una formación proviniente de colexos suizos. Fleur ye una d’eses persones qu’odia les entrevistes y que-y faigan fotos, y eso, nun mundu como’l lliterariu tan exhibicionista, ye una rareza. La so obra tamién lo ye.
«El temor del cielo» ye un cuentiariu que recueye siete de los sos cuentos que tán fechos como «a escuadra». Quiero dicir, y digo, que, anque los temes que trata son estremaos en cuantes a la temática, toos tienen una cadarma y un estilu mui asemeyaos. Son cuentos duros, como de fierro, con frases curties y direutes, y personaxes colos que ye perdifícil empatizar. Nun hai nengún cuentu nel qu’asomen los sentimientos normales, les allegríes, los amores que nun seyan freudianos. Hai un amor en «Los gemelos», pero ye más bien un amor tóxicu ente los dos hermanos que son raros de narices, y perdóneseme’l vulgarismu. Nun hai en tol llibru (o polo menos yo nun lu alcontré) un personaxe que pueda salvase, al que puedas garrate pa identificate con elli. Too ye frío, nestes narraciones, al puntu que me dexaron un tastu poco agradable al final de la llectura. Falando de l’autora diz un de los sos críticos que «le fascinan sus silencios». Parezme bien, pero yo prefiero siempre que me fascine lo que se cuenta. Nun ye’l casu.
