close
«Escolinos: el suplementu de la xente menudo»

«Escolinos: el suplementu de la xente menudo»

2013-12-12539Visitas

lesdosYe esi’l títulu d’un nuevu espaciu que’l diariu La Nueva España dedica pa los neños y rapazos. Echábase en falta dafechu, porque tres la desapaición, polos motivos que fueren, del suplementu “La Oreja Verde” qu’a lo llargo tantos años y con tan bona mano dirixó Paco Abril, nun había unes páxines especialmente feches pa la nuestra mocedá.

Hai que se felicitar, amás, porque eses páxines apaezan na vieya fala de Marirreguera, tan necesitada la probina de sofitos que la faigan medrar y llegar hasta eses nueves xeneraciones que van ser –si ye que lu tien- el futuru de la nuestra llingua llariega.

La direición y coordinación de les mesmes ye responsabilidá de la maestra, escritora y munches otres coses más Iris Díaz Trancho, que nun sé cómo saca tiempu pa tanto como quier facer. Y la cadarma del espaciu contién un artículu de fondu al rodiu d’un tema d’actualidá, un garapiellu de noticies variaes, collaboraciones de Damián Barreiro o dalgún otru collaciu en plan reportaxe, la pallabra del día buscando coses interesantes, y too ello aguapiao con semeyes y los prestosos dibuxos de David Ferrero.

Trátase, entós, d’un trabayu seriu y al empar entreteníu, de gran valir pa los escolinos de varies edaes, too ello rellacionao col mundu de la escuela onde tantes carencies s’afayen pola culpa de la escasez de personal y de medios qu’esti importantísimu gremiu carez.

Y asina, los amagüestos, les mazanes y la sidra, la nueche difuntos, les nueves teunoloxíes y otros dellos temes tienenamagüestu pasao per estes páxines, abondo interesantes, que se publiquen tolos miércoles nel diariu carbayón.

Sicasí, echo en falta una meyor presentación de les fueyes, con un diseñu más nidiu, más colorista y más llamativu. L’aprendizax nun tien que ser dalgo aburrío, serio o inclusive murnio, sinón que se pue facer un diseñu atrautivu y qu’atrope l’atención de los neños y de los mayores qu’esfrutamos con eses coses. Pero de xuro qu’eso correspuénde-y más bien a la direición del periódicu qu’a la esforzada coordinadora. En cualquier casu, dende les páxines d’esti blogue que tais lleendo, damos-y la bienvenida a estes prestoses fueyes y deseámos-y a la so direutora un llargu y bayurosu camín.

Leave a Response