Títulu: «After Dark»
Autor: Haruki Murakami
Traductora: Lourdes Porta
Editorial: Tusquets Editores
Si lleéremos esta novela tapando’l nome del autor, nunca nun sospecharíemos que se trata d’un autor xaponés. Namás dellos nomes propios podríen danos dala orientación al respeutu. Y ye ésti un datu buscáu pol propiu autor que nun quier danos nin el ñiciu de la ciudá onde se desendolca l’aición: «Una gran ciudá». Trátase, pues, d’una hestoria que pue asoceder en cualisquier parte.
Y falo «d’una hestoria», cuando en realidá esa hestoria nun esiste. Ye una novela ensin argumentu. Con un estilu ñidiamente «azorinianu» («Grandes salones recreativos atarraquitaos de xóvenes. Rinchantes soníos ellectrónicos. Grupos d’universitarios que tornen d’una fiesta. Moces col pelo teñío de roxo y piernes macizes asomando per baxo la falda…») Murakami fainos siguir la estela de tres o cuatro personaxes a lo llargo d’una sola nueche. Hai encuentros y desencuentros, y hai conversaciones. Sobre too, hai conversaciones. Alderiques como los que podemos tener nosotros una nueche que salimos de copes. Fálase de cine, de llibros, de música, d’eses coses ensin trescendencia qu’encartien pa pasar unes hores nun llocal nocturnu. Y d’ehí, a midida que l’amistanza va surdiendo ente les persones, pásase a falar de coses más personales, a desnudar dellos secretos, delles interioridaes que puxen per salir nesi contestu íntimu de la nueche.
Una universitaria de 19 años, con complexu d’hermana «segundona»; un músicu que toca jazz colos collacios; una prostituta china; la dueña de una casa de cites; un oficinista con doble personalidá… Seres toos qu’acueye la ciudá nocherniega, qu’entren, salen y van a nenguna parte, mientres esperen que llegue l’alborecer del nuevu día.
Murakami cuéntanos too ello cola so prosa ensucha y precisa, cuasi de guión cinematográficu, onde la figura del narraor pudiere ser sostituyida por una cámara de videu que nos va ufiertando los distintos escenarios. Eso nótase más entovía nunos pocos capítulos qu’asemeyen tar dientro un suañu, con esi surrealismu de les coses algodonoses y clautrofóbiques que nos asoceden mentantu dormimos. Nesi territoriu onde esiste vida nel interior de les coses, nos espeyos qu’amuesen la nuestra figura cuando yá nun tamos, o nos televisores que siguen ufiertando imáxenes anque tean desenchufaos.
Diz la propaganda que Murakami «escribe la mitoloxía del mundu modernu», y tamién que «ye un xeniu». Bien, nun lleí otres noveles del autor, pero si tuviere de xulgalu por ésta, abúltame que son eloxos mui desaxeraos.
«After Dark» ye una novela orixinal nel so tratamientu, y que lleemos con un aquel de desasosiegu, como si tuviere a puntu de pasar dalgo estraordinario, pero que llueu nunca llega a pasar. En fin, yo creo que promete más de lo que da.
