Títulu: «Rompepistas»
Autor: Kiko Amat
Editorial: Anagrama
Añu: 2009
CRÓNICA D’UNA SEÑALDÁ.- El catalán (Sant Boi, 1971) Kiko Amat ye, según nos dicen na contraportada del llibru, escritor accidental y periodista cultural ensin carrera. Nun sé si tendra «carrera», pero’l fechu ye qu’escribe pa una estrobada de periódicos, suplementos culturales y fanzines: «La Vanguardia»; «El País», la revista «Rockdelux» y el fanzine «La escuela moderna». Esta ye la so tercer novela. Pues bien, espero y deseyo que pase de ser esi «escritor accidental» que nos dicen, y entre na nómina de los que son escritores dafechu. O seya, a tiempu total.
Y ye qu’esta primer novela suya que yo lleo, prestóme tanto que la devoré nun viaxe de fin de selmana a La Coruña. Claro que l’ALSA tamién cuenta. «Rompepistas» ye’l nomatu del protagonista. Un rapaz de 17 años, que vive nun pueblu del centurón industrial de Barcelona. Un pueblu ensin pasáu, nin futuru, onde la mayor llacería que pues tener ye nun poder fuxir d’ellí. La novela cuéntanos en primer persona cómo ye esi pueblu y la xente que lu habita, sobre too los «coleguis» del rapaz, anque l’aición céntrase dafechu nos componentes del so grupu musical «Las Duelistas«: Carnaval (el so meyor amigu), Clareana (la so moza), el Chopped (un matón de barriu de bon corazón) y él mesmu. La historia ye supertriste, pero ta contada con tal sentíu del humor y tal cantidá de rellumantes metáfores y comparaciones, con un llinguax tan atrautivu que te garra dende la primer páxina y tienes que siguir lleendo.
Les rellaciones tormentoses de Rompepistes y Clareana, les pelées de los Skinheads por la Paz, la so pandilla (el Pimienta, el MD, el Peligro, el Bomba, el Antología, el Pachanga, el Puños, el Jejé, el Sutil…) colos Chungos, del pueblu d’al llau (unos verdaderos «patibularios»), la propia rellación del rapaz con sos padres, la vida nel chigre, o nel salón de peluquería… ta too contao con tal frescura que paez que tú, de dala manera, formes partes tamién del pueblu.
Pero la novela ye, penriba de too, una crónica señaldosa del pasu de la mocedá a la edá adulta. D’unos personaxes que, ante’l panorama tan prietu que tienen, ante la falta de futuru, deciden nun xorrecer. Siguir siendo eternos adolescentes. Y equí vien, al mio xuiciu, l’únicu defeutu que podría ponése-y al autor. Los personaxes, sobre too, Rompepistas, tán sintiendo señaldá, non d’unos fechos pasaos que recuerden, sinón de los que tán pasando en tiempu presente na novela. Nun esiste esa llonxanía que ye menester pa echar dalgo de menos, ta echándose en falta yá, nel mesmu momentu de l’aición, y ye que yo creo que ye l’escritor el que la siente, y non el protagonista. Y esti fala por boca d’aquel: «Creo que todo lo que hacemos lo hacemos porque es lo que más se acerca a continuar siendo niños. Porque ninguno de nosotros podía aceptar que lo de ser niños se había terminado, y queríamos seguir jugando«. Y n’otru llugar: «Y, aunque no me doy cuenta en ese momento, quizás éste es el fin definitivo de tu niñez. El dia en que te das cuenta de que tus padres ya no pueden ayudarte, ni protegerte del dolor, y que estás desnudo en medio del huracán de basura que está empezando a soplar. La tramontana de mierda que se levanta en la distancia, acercándose».
Novela xuvenil, novela adulta, novela entrañable, novela dura, escrita d’un mou que ye a sacar poesía de la miseria, miseria más humana qu’económica, onde un grupu de rapazos lluchen por que nun los arrastrie’l sunami de la vida, una vida ensin futuru a la que tán condergaos. Asina, lleéndola, un pue riise muncho (como yo), mentantu dalgo te garra’l corazón metiéndotelu nun puñu. Norabona a Kiko Amat por escribir la novela, y norabona a aquellos de vosotros que la lleáis. Va prestavos.
