Titulu: «Los amos de la guerra»
Autora: Clara Nieto
Editorial: Debate
Añu: 2005
UN ENSAYU IMPRESCINDIBLE.- El llibru tien na portada, amás del títulu, un sotítulu que pon: El intervencionismo de Estados Unidos en América Latina. De Eisenhower a G.W. Bush. Y ye, n’efeutu, un repás minuciosu, áxil y veraz de cómo la gran nación norteamericana nun dexó de manipular, comprar o valtar gobiernos, a lo llargo de décades, en defensa de los sos propios intereses. La so autora, Clara Nieto, ye analista política colombiana, fue embaxadora d’esti país ante les Naciones Xuníes y dirixó la la Oficina Rexonal p’América Llatina de la UNESCO.
A lo llargo y ancho de les sos 6oo páxines, Nieto va esbillando, per décades y paises, los principaes socesos d’aquella estaya del mundu y de qué forma los EE.UU fueron «metiendo’l cazu» ya influyendo nel desarrollu de la política internacional. De la revolución cubana a la cayía d’Allende; de les matances de campesinos en Guatemala al casu Irán-contra y los unvíos d’armes a la oposición nicaragüense, que taben prohibíos pol Congresu. Peles fueyes del so ensayu pasen Eisenhower, Kennedy, Johnson, Nixon, Ford, Carter, Reagan, Bush y Clinton, pero sobre too pasen los dictadores al serviciu de la CIA, les operaciones militares illegales, los paramilitares a los qu’entrenaben los «Boines verdes» y… los millones de dólares emplegaos en combatir lo qu’ellos llamaben «la subversión». Asina, Kennedy y la so «Alianza pal progresu», de la que diz que «en los tres años de su gobierno, nuevas dictaduras militares, con banderas anticomunistas, derrocan gobiernos constitucionales». O cómo ye’l propiu Nixon el que da la orde direuta a la CIA pa qu’intervenga en Chile, baxo la coordinación del Secretariu d’Estáu Henry Kissinger: «Reparte cerca de seis millones de dólares entre los partidos de la oposición, los periódicos, la radio, los sindicatos, los gremios profesionales y sostiene las huelgas». Mientres «el Pentágono se mantiene en contacto con los militares chilenos y les suministra armas». Too pa finar col réximen constitucional de Salvador Allende. Eso por poner, namás, un exemplu.
El resultáu ye un ampliu frescu, detalláu con nomes, feches y cifres, y escritu de mou claru y entreteníu, qu’amuesa tola actividá subversiva (ésta sí que lo ye) de los Estaos Xuníos más alló de les sos fronteres. Ye un llibru dafechamente imprescindible pa conocer el desarrollu d’una parte mui importante de la historia contemporanea y de les sos posteriores consecuencies. Como diz d’él Noam Chomsky: «…un estudiu exhaustivu ya illuminador. Una perbona guía dende una perspeutiva llatinoamericana». Paga la pena, nun sólo lleelu, sinón tenelu na biblioteca.
