Títulu: «Bajo el influjo del cometa»
Autor: Jon Bilbao
Editorial: Salto de Página
Añu: 2010
UN CREADOR D’ATMÓSFERES.- Ye esti un llibru de cuentos qu’algamó el premiu Tigre Juan na so XXXII edición. Pese al nome tan vascu, l’autor ye un asturianu de Ribesella con dellos otros premios al costazu. Nunca nun lleere nada d’él, o seya qu’esti fue’l primer contautu cola so prosa. Tengo que dicir, ya de mano, que l’estilu de los cuentos de Bilbao me presta. Nun sólo eso, sinón que ye un estilu paecíu al que yo tengo emplegáu en munches de les mios narraciones: una situación cotidiana, vulgar, na que, de sutrucu, asocede dalgo que la cambia. Que-y da un nuevu aspeutu a lo normal y que s’alluga ente los personaxes camudándolos. Esta ye la téunica que Jon Bilbao emplega pa los sos ocho cuentos que componen el llibru. Pero esta téunica, que tampoco ye novedosa, necesita d’un aquello que l’autor remana de mou maxistral: l’atmósfera. Una atmósfera, un clima -tamién podíemos dicir- que fai qu’una historia que principió siendo «banal», se tracamundie de sópitu en dalgo que nos inquieta, que nos esmolez y, en muches ocasiones, cuasi nos aterroriza. Nun porque los cuentos lo seyan de terror, nada d’eso. Pero sí qu’hai una especie de mieu a lo que pueda asoceder, a lo que nos entra, non pol entendimientu, sinón por otres «intuiciones». Lóxicamente si se fala d’una atmósfera, quier dicir que ye difícil d’espresar con pallabres, amás porque munches veces vien dada precisamente polos silencios, poles ausencies o polos llugares onde se desendolca l’aición.
Con too y con ello, nun tolos cuentos tienen, al mio xuiciu, igual valir. Pal mio particular gustu, tán mui bien (quiciás tamién pola novedá que m’aportaron) los cuatro primeros, baxando’l nivel nos cuatro últimos. Mención especial, que m’encantó, al primeru «Los espias», y al cuartu «Soy dueño de este perro», nel que permanez latente una violencia amatagada que a la fin sólo s’apunta, quedando’l verdaderu final al entendimientu del llector.
Una prestosa sorpresa, pues, esti llibru y esti nuevu autor (nuevo pa min) al qu’habra que siguir na so trayeutoria lliteraria, dafechamente esperanzadora.
