Títulu: «La Gran Armada»
Autores: Colin Martin y Geoffrey Parker
Torna: Julio A. Pardos Martínez y Carmen Martínez Gimeno
Editorial: Planeta, S.A. y Círculo de Lectores, S.A.
Añu: 2011 (d’un orixinal de 1988)
LA HISTORIA DEFINITIVA.- Los socesos d’agostu de 1588 nos que’l Rei d’España, Felipe II, intentó invadir la Inglaterra isabelina fueron, pola so importancia, recoyíos en tolos llibros d’historia y suxetu esclusivu d’otros munchos llibros d’autores de tol mundu. Los fechos yá conocíos podríen resumise nel intentu d’allugar en territoriu inglés, a una gran parte del preparadísimu exércitu de Flandes, al mandu d’Alejandro Farnesio, Duque de Parma, un de los meyores xefes militares de tolos tiempos, pa que nun ataque rellámpagu, se plantare en Llondres y derrocare a Isabel I. Y si esto nun fuere posible obligala, polo menos, a firmar un tratáu favoratible a los intereses hispanos nel que debiere recoyese’l so abandonu de territoriu holandés, y un compromisu de nun atacar a los barcos que trayíen les perres d’América. Pa facer esto, la idea yera unviar dende Lisboa, d’aquella en poder español, una gran flota de barcos que, alcontrándose col de Parma nun puertu del Canal (Dunquerque yera l’escoyíu), axudara a facer esi treslláu de los 17.000 veteranos de Flandes a una playa del Condáu de Kent. El resultáu final yá lu conocemos: l’Armada Española nun llogró contautar coles fuercies de Farnesio, colo que la invasión fracasó y, amás, el regresu de los barcos pola ruta del Norte (bordiando Inglaterra, Escocia ya Irlanda) fue toa una odisea onde se perdieron una gran parte d’ellos.
Con un estil claru y lliterariu, l’hispanista inglés Geoffrey Parker, caderalgu nuna universidá norteamericana, y el profesor eméritu d’ arqueloxía somarina n’Escocia, Colin Martin, acometen la empresa de desplicanos cómo fue toa aquella enorme aventura, rescatando cantidá de documentos inéditos de la época, y estudiando los restos de los barcos naufragaos nes costes escoceses ya irlandeses pa dar una información lo más veraz posible. A tal puntu ye asina, que los dos estudiosos echen per tierra munches de les teoríes «grandonistes» que presentaren otros historiadores (mayormente ingleses) respeuto al papel d’unos y otros, poniéndolu como un gran trunfu de la «pequeña» escuadra inglesa, frente a los más o menos ineptos españoles.
Yá’l propiu títulu da una pista, pues en llugar d’emplegar el más popular de «La Armada Invencible», nome utilizáu por dalgunos escritores ingleses pa ridiculizar a aquel continxente de barcos, utilicen el de la Gran Armada que nun tien nenguna connotación peyorativa. El llibru estudia de forma amena’l contestu históricu de la dómina, y los motivos que llevaren a Felipe II a pensar n’aquella frustrada invasión. Depués rellata, con cantidá de detalles, cómo yeren dambes flotes y cómo fueron desendolcandose los fechos, día por día, deteniéndose no qu’unos y otros ficieron bien o mal, finalizando nes causes que produxeron el fracasu, un fracasu que tuvo a puntu de nun selo, puesto que la flota española, pesie a too, llegó a tar nel sitiu previstu pal embarque, y sólo la mala comunicación postal con Farnesio, que llegó un par de díes tarde coles sos tropes, torgó que la empresa llegare a bon términu.
Pero’l llibru cuenta munches coses más qu’estos fechos históricos. Y asina, detiénse con conocimientu y detalle nel pelligrosu retornu de los barcos de l’Armada peles costes escoseses ya irlandeses. Les aventures que pasaren munchos d’ellos, la mayoría desastroses, y unes poques favoratibles. Y qué fue d’aquellos homes naufragaos en tierra hostil, anque nun siempre enemiga, yá qu’Escocia yera país neutral. Conocemos a los capitanes d’aquellos barcos, dalgún de gran personalidá, como don Juan Martínez de Recalde, o don Alonso Martínez de Leiva, home de rellumante carrera millitar y amplísima cultura que, por exemplu, citaba nos sos escritos profesionales a Fray Luis de León. Ca una de les histories d’aquellos naufraxos daría, ensin dubia, pa escribir una novela. Y pa finar, los autores incluyen un últimu capítulu especulativu que titulen: «Si la Armada hubiese desembarcado», comentando lo qu’hubiere podío ser y nun fue, y cómo quedaría’l mundu de la época si les tropes de Flandes tuvieren invadío Inglaterra. El llibru amiéstase con unos apéndices de cómo yeren caún de los barcos que participaron n’aquel alcuentru, detallando les tonelaes, cañones, marineros, soldaos, y llugar y fecha de construición. Y cómo yeren l’artilleria española ya inglesa en 1588, fecha de los socesos. Un trabayu, en resume, completísimu y que xune la calidá d’un estudiu históricu rigurosu, cola amenidá d’una historia bien cuntada que nun tendría d’envidiar a cualquier novela d’aventures. Un placer, la so llectura.
