Títulu: «22/11/63»
Autor: Stephen King
Torna: Gabriel Dols Gallardo y José Oscar Hernández Sendín
Editorial: Mondadori, S.A. y Círculo de Lectores
Añu: 2012
EL PELLIGRU DE XUGAR COL TIEMPU.- Facía yá muncho que nun lleía nada de Stephen King. Hubo una época en que yera un de los mios autores preferíos, pero’l pasu del tiempu fue alloñándome d’él, o a él de min, y toles últimes histories suyes yá me dexaben indiferente. Y emplego xustamente esta pallabra porque les noveles de King producíente cualquier cosa, menos indiferencia. Nun fai falta desplicar quién ye Stephen King, un de los autores que más llibros viende y quiciás el que más fue lleváu a la pantalla: «El resplandor», «Misery», «Carrie», «Cadena perpetua», «La milla verde»… y munches otres qu’agora nun recuerdo. Si te prestaba pasar mieu, pero mieu daveres, había que lleer al bonu de Stephen porque, por exemplu, los sos vampiros acoyonábente, non como estos d’agora, d’esa que-y asonsaña hasta’l nome (Stepheníe Meyer) que paecen sacaos de la Pasarela Cibeles. Por cierto, que King tien, pal que nun la conoza, una guapísima novela xuvenil que a min prestóme pola vida lleer: «Los ojos del dragón». Sigo.
El tema en sí d’esta postrer novela de King nun aporta nengún argumentu nuevu: el masuñáu tratamientu, tan de moda polos americanos, de los viaxes nel tiempu. La verdá ye que nada de lo que lleí o vi nel cine, supera aquella primer novela de Wells, «La máquina del tiempu». El títulu de la historia del autor de Maine, «22/11/63», fai referencia, claro, al día en que mataron al Presidente Kennedy, y nun fai falta ser mui aviespáu p’aldovinar que lo que trata’l mocín de la novela, pente medies d’un viaxe temporal, ye evitar que lu maten. O seya, que se trata de llocalizar a Lee Harvey Oswald y encargase d’él, enantes de qu’él faiga lo mesmo con don John Fitzgerald.
Pero esto que, nuna primer güeyada, paez dalgo fácil, pues conociendo la biografía de Oswald podríes interceptalu en cualquier momentu, King allárgalo durante 850 páxines. Y la verdá ye que nun t’aburres, porque’l profesor d’institutu Jake Epping, que ye’l que viaxa nel tiempu, por cierto, d’una forma bastante «perronera», quier primero axustar cuentes con un par de casos qu’él conoz, polos sos alumnos, asina que yá puestos n’aquella dómina, aprovecha pa iguar tres o cuatro casos previos a don Lee Harvey.
Con eso y con too, a la novela sóbren-y unes cuantes páxines que paecen repitíes anque, repito, siempre se llee con entretenimientu porque pasen munches coses y King sabe cuntales mui bien. Pero la novela plantega tamién dalgo que yá s’apunta al principiu, pero que sólo al final se desendolca, que ye la manipulación de la naturaleza pol ser humanu. O dicho d’otru mou, les consecuencies que podía trayer un cambiu, más o menos importante, na historia, pal mundu actual. Ye otra versión del efeutu «mariposa», eso de que si una mariposa mueve les ales en Xapón, pue provocase un terremotu en San Francisco. Y esti nuevu factor que remana King, da-y un renováu interés a la parte final de la novela, sobre too pol balance de los fechos camudaos, porque d’un fechu positivu, pudieren derivase unes consecuencies devastadores. Esi ye’l retu que nos plantega l’autor, qu’él resuelve a la so manera d’un mou un tantu «románticu». Y nun cuento más pa que dalgunos llectores del blogue, que ya me tienen amenazáu, nun salgan a escorreme.
Puedo recomendar, entós, y recomiendo, la novela a tolos «fans» de Stephen King, y a los que quieran tener unes hores entreteníes, calumbáu nos años 50 del sieglu pasáu, cola so música rockera, los sos modelos d’época, los coches aquellos tan «fardones», mientres que siguen una historia con amor, suspense, acción y dalgo de política. Un bon «cocktel» pa distrayese.
