Títulu: Inmersión
Autor: Christophe Ono-Dit-Biot
Torna: Iballa López
Editorial: Berenice
Añu: 1914 (n’España)
L’ACADEMIA FRANCESA ANDA REGALANDO PREMIOS.- Avalada pol premiu de 2013 de l’Academia Francesa, un de los mios fíos «picó» y regalóme esta novela na creyencia de que diba a prestame: «Paez qu’una parte de l’aición trescurre n’Asturies y sobre too en Xixón» -díxome’l probe enantes d’entregame’l «bodriu» (1)-. Como tengo un pautu conmigo mesmu de dar a cualisquier llibru una oportunidá que consiste na llectura de, como mínimo, cien páxines, tuvi qu’echar mano de toles mios reserves de paciencia ya infusiones de menta, pa poder cumplir lo comprometío ensin azotar el llibru pela ventana.
Parte de l’aición, de verdá, trescurre n’Asturies, pero una Asturies de Zarzuela, onde los Picos d’Europa arrodien Mieres y les güeles xixoneses, asitiaes nunes tiendes de campaña qu’hai na playa (deben ser les casetes), cosen y cunten histories en bable a los sos nietos. A too esto, un periodista francés que debía tener pocu trabayu porque andaba tol día «mangándola», cuerre detrás d’una fotógrafa asturiana que nun se sabe mui bien a qué xuega. Con dicir que la primera vez que faen l’amor ye nel Muséu de la Minería creo que ta too dicho. Y nun ye broma.
Poques veces lleí (hasta la páxina 100) una historia más cursi y endulzayada qu’ésta. Siguiendo una nueva moda d’un pseudo-romanticismu rinchante, al estilu d’esi Federico Moccia o dalgún otru pelamangos asemeyáu, esti francés con nome que paez una cosadiella, empaláganos con frases y comportamientos nuna Asturies propia pa estraterrestres que conducen… a dexar el llibru na estación términi fixada. A la fin, lo qu’un-y desea al autor y al llibru, y de pasu a l’Academia Francesa, ye a que prueben ellos esa Inmersión del títulu y que se queden perellí una temporada, faciéndo-y compaña al famosu «Titanic». ¡Qué velea!
(1) Bodriu, el: Esllava, comida que s’echa a los gochos. Comida mal fecho, mal arreglao. DALLA.
