Títulu: Tea-Bag
Autor: Henning Mankell
Editorial: Tusquets
Añu: 2010
UN ENSAYU.- En cuasi toles noveles de Henning Mankell hai un tresfondu social. Les que se desendolquen nel so país d’orixe, Suecia, traten del tema de los inmigrantes y de cómo, a midida del aumentu de los últimos tiempos, van camudando les actitúes hacia ellos pasando, d’una cierta tolerancia, a delles postures que raspien col fascismu. Y nes noveles qu’asitia nel continente africanu -nun hai qu’escaecer qu’él vivó munchos años en Mozambique- intenta desplicar les causes d’esa emigración en cata d’un mundu meyor, abandonando pueblos, families, raigaños… Pero esto que suel ser avezao nos sos llibros, vien siempres como un telón de fondu a unes histores más riques, más interesantes qu’a la sola denuncia d’una situación tan inxusta como frecuente.
Ensin embargu, nesta novela l’argumentu, simple, paez namás una escusa pa cuntar tres o cuatro histories de moces que viven en Suecia, ensin papeles, ensin domiciliu fixu, abeyando d’un sitiu a otru y arrastriando consigo unes vivencies que les marcaron pa tola vida. Asina, el presuntu protagonista de la novela, l’escritor de poesía Jesper Humlin, un personaxe divertíu que paez escapáu d’una obra de David Lodge, nun ye más que l’enllaz necesariu pa poder cuntar les histories de probeza y desarraigu d’unes moces que llegaron al so país buscando un mundu meyor. Jerper Humlin ye comencíu por unes casuales circunstancies pa da-yos un cursu d’escritura creativa a un grupu d’estes moces, ente les que destaquen l’africana que da títulu al llibru -Tea-Bag-, otra llegada d’un país de l’antigua Unión Soviética, Tania, y una última procedente d’Irán que vieno con parte la so familia. D’esi mou, ca una de les tres moces va esgranándonos cómo fue la so historia, y les circunstancies poles que tuvo de pasar hasta llegar al puntu onde s’alcuentra. Un puntu que tampoco nun paez un puntu final, sinón que, lloñe de tener la so vida encarrilada, siguen teniendo que fuxir d’un llau a otru, como persones invisibles, inesistentes.
Al mio xuiciu, nótase demasiao l’interés del autor en describir y denunciar unos fechos mui murnios, al puntu que da la impresión de que meyor podría tener escrito un ensayu en llugar d’una novela, que noto falta d’una mayor cadarma argumental. Interesante, pues, pola denuncia, pero más floxa como obra de ficción a la que-y falta un poco más de «cuayu».
