La editorial Trabe, na so coleición Pesllera, acaba d’asoleyar, col númberu 4, la reedición de la mio primer novela xuvenil (y primera de la lliteratura asturiana) Fontenebrosa: El reinu de los silentes. La primer edición data del añu 1984, una edición mui rústica, autofinanciada, con dibuxos de Mª Teresa González y una portada que llevaba un grabáu de Palmerín d’Inglaterra, un llibru de caballeríes del sieglu XVI, escritu pol portugués Francisco de Moraes, que siguía la estela de los palmerinos, aniciada col Palmerín d’Oliva en 1511 que, anque pudiere paecelo, nun tien na que ver conmigo.
Fontenebrosa cayó con bon pie, o quiciás fuere que l’ausencia d’otros llibros pa rapazos encartió pa que s’espardiere per tol país al puntu qu’aquella edición agotóse en non munchu tiempu. Entovía agora, alcuentro a xente de mediana edá que me comenta qu’esi fue’l primer llibru n’asturianu que lleeren. En 1992, la propia editorial Trabe, na so coleición Montesín, fizo otra edición, esta vuelta con dibuxos de Berto Álvarez Peña. Tamién agotada col tiempu, vuelve agora esta 3ª edición, esta vez ensin dibuxos nel interior, anque con una perguapa portada de Samuel Castro. El diseñu fízose asina pa guardar un oldéu cola segunda parte de la novela, Fontenebrosa II: la rebelión de los Homosaurios, qu’algamó el premiu Montesín del añu 2008.
Asina qu’agora tán xuntos, por primer vez nel mercáu, los dos tomos d’esta historia de bonos y malos, d’aventures y desventures, d’espada y bruxería, onde Goyo, Ximena, Rodolfo el señor del Ferre, los lluchadores Silentes, los intelixentes Furadores, los pérfidos Homosaurios, la fía d’una bruxa, Camila, el flaire fugáu del conventu Esteban, el Magu Paniceres, y otra riestra de personaxes más tán esperando por vosotros pa cobrar vida, una vuelta más.
Pese al tiempu pasáu, entiendo qu’entovía sigue teniendo fuercia la historia, quiciás porque esti tipu d’histories son intemporales. La llucha del bien escontra el mal, representada de milenta formes distintes, ye una constante na lliteratura narrativa épica de tolos tiempos y llugares. Abúltame que, colos defeutos propios y les carencies personales, sigue prestando lleer esta, vamos llamala saga, de la lliteratura n’asturianu.
Quiero dar, dende equí, les gracies a la editorial Trabe por siguir confiando na historia, y sobre manera a Esther Prieto y a Severino Antuña, direutores de la coleición Pesllera, por tan prestosa edición. ¡Que’l mercáu os lo recompense!
