Díxolo elli nalgún sitiu, o inventélo yo porque me paeció que pudo dicilo elli, eso de que l’historial de navegación pudiere ser el resume de les páxines web que visitasti nun tiempu, pero tamién y -digo yo- más importante, el resume de llugares (vivíos, suañaos, maxinaos) en tola to vida. Seya como fuere, l’ «Historial de navegación» ye un ¿poemariu? d’Héctor Pérez Iglesias.
Permítome poner una interrogación enriba la pallabra poemariu porque, la verdá, nun toi seguru de que lo seya. ¿Pero por qué non un «aneudotariu»? O, mesmamente, ¿un prosariu poéticu? Bueno, ehí dexo estes entrugues pa que los llectores lo valoren y lo bauticen como quieran.
En cualquier casu, la impresión que me da a min la llectura del llibru del señor Pérez Iglesias ye que ye un poco un «caxón de xastre» onde fueron a parar botones, tisories, filos de munchos colores, unos cuantos dedales, unes tices pa marcar los pantalones… coses qu’agora, nel tiempu del «pret a porter» tán yá cuasi esapaecíes. Poro, l’autor cambia’l conteníu de los materiales por otros más intelectuales onde somos a ver textos en prosa, en versu, una especie de «sentencies» o «aforismos» o pequeñes «olivines», que podríemos rebautizar como «hectorines», talo que’l famosu toreru Chicuelo inventó les «chicuelines» o Manolete, les «manoletines». (Incisu: nunca nun emplegué tantes comines como nesti comentariu.) Asina:
«La lluna ye un furaquín na muria la nueche al que dalgunos arimamos un güeyu pa espianos a nosotros mesmos». Val, muy guapa. Más «hectorines»: «La nueche ye un país al que toos llegamos como emigrantes descalzos pisando les sos fronteres semaes d’azafrán». «El soníu de tela al vientu nel tendal: esa llingua cola que l’aire nos fala de pureza». Hai más, claro, pero vamos dexalo equí porque como exemplu yá val. Igual pagaba’l tiru que ficiere un llibrín solo con «hectorines». Ehí queda la idega.
Xunto cola economía poética, en cuantes al tamañu, non al conteníu poéticu, hai nesi caxón de xastre otros poemes más llargos. Unos poemes que rebusquen al rodiu de la infancia y el mundu que l’arrodia. Unos reflesivos, otros señaldosos, dellos otros traviesos… Abúltanos que se trata d’unes alcordances mui compartíes, o que puen compartise mui bien, anque nel casu suyu fuere un neñu «d’aldea» y nel míu, por exemplu, un neñu «de ciudá». Y tamién salten a traviés del tiempu porque la edá mía y la suya nun tienen nada que ver (por suerte pa elli):
«Alcuérdome de facer xirar fuerte a mano la rueda de la bicicleta pa ver prendese la dinamo». «Alcuérdome de les palmatories pa les veles». «Alcuérdome de les llinternes de pila de petaca»…
De la llectura del «Historial de navegación» vese mui nidiamente como Héctor recuerda, y por eso da-yos vida, a los sos antepasaos: güelos y bisgüelos, pero tamién tataragüelos, anque a estos nun los conociere personalmente, claro. Pero tien anéudotes d’ellos, lo cuál ye, como dicía, una manera de caltenelos vivos. L’autor mete tamién nel caxón otros temes/poemes variaos: la casa familiar, los amigos, unos pocos poemes d’amor. En toos ellos llate la sensibilidá y una cierta tenrura, que tresmite un muncho de la forma de ser d’Héctor, y dígolo yo que nun lo conozo mui bien, pero estos poemes, digo, lu delaten. Podríen dicise munches más coses d’esti llibru, pero yo nun soi voz autorizada pa facelo. Otros habrá qu’afonden más y con más conocimientu que yo. Namás quiero dexar unes impresiones al rodiu de la llectura d’esta guapa obra de Héctor Pérez Iglesias, que me prestó muncho lleer y que recomiendo a tolos que-yos guste la poesía… y la prosa. O seya, la buena lliteratura.
«Tienen a veces los portales recién fregaos una señardá de playa
a finales de branu: l’arume la llexía como yodu caducao, guirnaldes
d’espluma puerco podreciendo nuna oriella de baldoses al baxar
la marea. Dalguién que garra con xeitu resignáu un calderu col
que sabe que yá nunca volverá construyir castiellos d’arena.»
Editáu por Trabe, col. Pontiga 66
