La selmana pasada llamóme Georgina Fernández pa participar nel programa de la RPA «Noche tras Noche», que dirixe Marcos Vega. Queríen dambos falar sobre’l personaxe d’Inés Saldaña, protagonista de la mio novela «Relato de las aventuras de Inés Saldaña, y de cómo ayudó a Colón a descubrir América» (Ed. Pearson. Colec. Alhambra joven nº 5. Madrid, 1ª edición del 2006. Nes caberes ediciones, la editorial acurtió’l títulu a «Las aventuras de Inés Saldaña»). Sorprendióme, porque como pue vese pola referencia, ya lleva siete años «en danza» con tres o cuatro ediciones, la última d’elles pal mercáu llatinoamericanu. Pero teníen interés en que-yos cuntase un poco cómo fue aquel primer viaxe de Colón. El del Descubrimientu.
Depués de dicir que nun yera l’Almirante de la Mar Oceana personaxe de la mio devoción (como creo que se deduz de la
llectura de la novela) pasemos llueu a comentar dalgunes de les incidencies de l’aventura, pues a nun ser los personaxes d’Inés, y del so namoráu Diego de Alcaraz, el restu ta fielmente recoyío, si bien novelao, de lo que ye la Biblia d’esti tema: La «Historia de las Indias», de Fray Bartolomé de las Casas. Y ye que, al marxe de la nuestra valoración personal sobre’l resultáu d’aquel «alcuentru» de cultures y civilizaciones, lo cierto ye que’l viaxe fue, en sí mésmu, dignu d’una gran «superprodución» de les que son tan amigos los americanos, incluyíos dos motines a bordu de la Santa María (que por cierto nun yera una carabela, sinón una nao), y les intenciones de tirar a Colón pela borda. Los grandes méritos llevólos l’Almirante, pero’l viaxe nun se ficiere si nun fuere polos famosos hermanos Pinzón, sobre too pol mayor: Martín Alonso. N’efeutu, don Cristóforo (o Cristobal), yera un completu desconocíu na comarca de Palos, y naide s’embarcaría con elli a una empresa tan alloriada. Amás, el pueblu de Palos tuvo que correr colos gastos d’armar dos carabeles del so bolsu, por unes deldes que tenía contrayíes cola facienda real. Como pa face-y favores al xenovés… Fue Martín Alonso Pinzón el que dio confianza pa la xera, comenciendo a los marineros de la rodiada pa embarcase, llogrando que la cosa saliere p’alantre. Y ye que los hermanos Pinzón, marineros, armadores, prestamistes y, dizse, inclusive pirates (de Vicente Yañez paez que ta probao) gociaben de gran prestixu en toa Andalucía. Y lo mesmo asocedió n’alta mar, cuando la marinería, calculando’l tiempu de la vuelta si nun atopaben tierra, promovieron los motines de los que falé, salvaos pola autoridá de Martín Alonso y cola axuda lliteraria de la mio Inés, mazcarada naquella ocasión del marineru Rodrigo de Triana.
Toi viendo que m’enrollo malamente, o seya que’l que quiera conocer tola historia dafechu, que merque la novela que ye guapísima («empondérate boroña, que nun hai quien te coma«) y paga la pena lleéla. Pues de too eso falemos a lo llargo de más de venti minutos na RPA Georgina, Marcos y yo. Gracies a ellos por recordame, depués de tantos años, a un de los mios personaxes preferíos: la fía de Cosme Saldaña y Antonia Castejón. O seya, Inés Saldaña (a) Rodrigo de Triana. El tiempu pasóme voláu.
