Esti añu los Reis Magos acertaron y, xunto a los yá clásicos calcetinos, colonia y pañuelos, traxéronme un llibru que tuvi buscando per un tiempu. El títulu ye’l qu’encabeza estes llinies y l’autor ye un vieyu conocíu míu, compañeru d’estudios y, desgraciadamente, yá fallecíu. Coincidí con José Avello nel Corazón de María, nos caberos años del bachiller. Y de xuro qu’aquella fue una bona collecha pues hubo escritores (xunto a Avello taba, por exemplu, Mariano Antolín Rato), científicos, caderalgos, homes de negocios y hasta un conseyeru del Gobiernu del Principáu y conocíu sindicalista como fue Jesús Urrutia. Otros nun espoxigamos tanto.
El llibru de Avello andaba mui escaecíu y mal distribuyíu, porque pasó d’editase n’Alianza editorial, al fondu d’Ediciones Trea que lu reeditó. Yo tengo la edición d’Alianza. Y la verdá, allégrome muncho del esfuerciu que ficieron los Reis (creo que fue Gaspar, que me guiñó un güeyu nel desfile) cola ayuda del gran Rafa Gutiérrez Testón, porque la novela ye, ensin nenguna desaxeración, una de les meyores de la lliteratura contemporania española, igual xunto con «Corazón tan blanco», de Javier Marías, o «Si te dicen que caí», de Juan Marsé (Oliva dixit)
La historia cuenta la rellación de cuatro amigos que vivieron xuntos los años escolares y que, depués de tiempu, vuelven a atopase con media vida detrás y unes esperiencies mui diverses. El billar ye una de les sos pasiones y, asina, axúntense nuna sala cutre d’un café de mala muerte.
La novela va siguiendo a caún d’ellos, contándonos les sos andances presentes y pasaes, les coincidencies ente ellos y les diverxencies, aprovechando pa destapecer dellos aspeutos pocos claros de les sos propies vides. Fechos que vivieron pero que, naquellos momentos, nun fueron a entender. Con un llinguaxe un poco decimonónicu que dacuando paezte tar lleendo a Clarín, Avello envuelve la narración d’un tonu aparentemente humorísticu, qu’aprovecha pa reflexonar sobre l’interior de los personaxes y la so rellación col mundu nel que viven. Con partes mui divertíes, el rellatu tien, ensin embargu, un posu amargu que, nalgunos momentos, desbórdase. Hai na novela munchu amor y munchu desamor. Sexu y dolor. Y tamién munchu odiu conteníu que nalgún momentu españa. Sobre los protagonistes esnala tol tiempu esa deceición que a toos nos llega de, tener sido unos mozos progres que creyíen que podíen camudar el mundu, pero que ye’l mundu el que termina por camudate a ti. Nada nuevo embaxo’l sol.
La historia ta cuayada de secretos. Unos secretos que van desanubriéndose a lo llargo de les más de setecientes páxines del llibru y que, sobre too, na so parte final corren y corren hasta algamar a los cuatro amigos. Un d’ellos, de los secretos, vien inmersu na propia narración de la novela. El narrador que cuenta en primer persona nun tien nombre. Sabemos que ye un de los cuatro pero siempre se nos furta la so personalidá. Tal paez que ye él el que cuenta tolo qu’asocede lo cuál resulta imposible pues nun ye posible que conoza fechos y pensamientos de los otros amigos. Dalgo s’esclaria al final, pero non too. Y travesando la novela de mou tanxencial ta la Guerra Civil y los perversos fechos qu’ella traxo consigo, y que tamién vamos dir conociendo con un ciertu ascu y repulsión. Unos fechos que cambiaron munches vides, ente elles les de dalgún de los amigos. Quiciás lo que menos me gustó fue la parte final de la historia, onde s’esclaria una rellación amorosa enllena de morbu y fetichismu que te dexa con un tufu amargu y un mal tastu na boca que, pa min, ye un pocu escesivu ya innecesariu pa lo que se quería contar. Pero, claro, l’autor siempre manda.
Por tolo dicho, paezme que se nota lo que me gustó la novela que lleí d’un tirón, pese a que la so llectura nun ye fácil, anque tenga dellos momentos d’esparcimientu y diversión que paecen sacaos de les vivencies qu’aquel cursu del Corazón de María tuvimos colos cures que nos daben clase. Eso sí, sirviéronme pa recordar a aquel chaval, aquel compañeru d’estudios, llistu, agradable, y de pensamientu inquietu que, pese al tiempu, está retratáu na novela.
