close
La bicicleta verde

La bicicleta verde

2016-11-22La bicicleta verde662Visitas

la-bicicleta-verdeEsti día en la 2 de televisión española, punxeron un película d’una direutora d’Arabia Saudí, cuyu nome pa los curiosos ye Haifaa Al Mansour pero que nun ye necesario conocer, que ye -la peli- una verdadera guapura. Película cenciella, protagonizada por una pareya de neños que paez que nun tán actuando sinón, namás, viviendo la vida. Una vida mui dura pa les muyeres, nun país machista non, lo siguiente. Ellí, esi réximen medieval, nun dexa salir a les muyeres a la cai sinón ye tapaes d’enriba a abaxo. Nun puen mercar sinón en sitios pa muyeres (alcordáisvos de los negros nos autobuses, pues igual), siendo unes persones mutilaes, de tercera categoría, al puntu que’l maríu pue volver a casase con otres muyeres ensin falta dexales, nin repudiales. Nun contentos con eso, llograron que seyan les propies muyeres les guardianes d’eses costumes, les que faigan pervivir los «roles» riñendo y castigando a les neñes que s’atrevan a ponelos en custión: madres, mayestres…

Wadjda ye una neña de diez años, simpática y contestataria, que constantemente vive na  llende de lo autorizao. Ta emperrada en tener una bicicleta pa poder competir col so amigu Abdullah y ganalu, pero nel so pueblu ta mui mal visto qu’una neña ande en bici, porque nun ye decoroso. Wadjda aforra pa mercar la bici mentanto trata de comencer a so ma pa que la dexe. Pero l’argumentu ye lo de menos (pa ella non, claro), lo que na realidá nos ufierta la historia ye la pervivencia d’un réximen tiránicu, asquerosamente machista y que, ensin embargu, nun ye criticáu poles grandes potencies por que-yos interesa comerciar con elli. Nun sé si la direutora vive o non nel so país, pero en cualquier casu ye una valiente que denuncia, ensin falta grandes aspavientos, a esa sociedá machista cola sola axuda d’una cámara y unos actores que lo borden. Nun dexéis de vela.