Eterna aspirante al Premiu Nobel y al Pulitzer, del que fue finalista tropecientes vegaes. Narradora, poeta, ensayista y editora. Con más d’un cientu llibros publicaos. La norteamericana Joyce Carol Oates (Nueva York, 1938) ye una de les escritores más respetaes del panorama lliterariu d’anguaño. D’una temática «dura» (dalguién que nun recuerdo dixo d’ella qu’escribía como un home, seguro que con un aquello de machismu o igual pa facer gracia), nunca refugó tocar los temes sociales más escabrosos. Non solo nun los refugó, sinón qu’entró nellos «a sacu»: violencia, abusos sexuales, violación… Y tamién otros como la probeza nel campesináu o les tensiones ente clases sociales. Nun hubo asuntu que-y fuere ayenu.
La so cabera novela, «El señor Fox», ye d’esti mesmu añu y afonda nun tema de los más repulsivos que pueden tratase como son los abusos sexuales a menores. Francis Fox ye un afamáu y entrañable profesor de Lliteratura nuna escuela privada, que cuenta cola simpatía y l’almiración de los sos alumnos y alumnes. Modernu, cercanu, podíemos dicir «enrolláu», toos s’esfuercen en cayé-y bien, en tener el so favor. Sobre too les mocines (falamos de 12 a 14 años) tán toes namoraes d’elli y nagüen pa que les llame al so despachu pa correxi-yos los trabayos y da-yos conseyos pa meyorar el rendimientu. Lo que naide sabe ye que, embaxo esa mázcara de «profe guay», el señor Fox ye un pedófilu. Na novela esplíquense les táctiques qu’emplega, y que nun adelanto porque ye parte importante de la historia, pero que les propies interesaes nun son a pescanciar en tola so magnitú.
Pero la novela nun trata sólo d’eso, anque esi seya’l nudu gordianu del asuntu, sinón fonderamente de la muerte del señor Fox que, nun descubro nada, yá acontez nes primeres páxines del llibru. Una muerte estraña cuya resolución va a corresponde-y a un Inspector del pueblu onde se desendolca l’aición. Un nativu de la zona, fríu, tercu, más sagaz que llistu, con dalgo de zorramplería aldeana que, migayín a migayu, va tirando d’unos y otros filos tratando de ver lluz nun asuntu mui escuru.
A lo llargo de les sos 500 páxines lo que na realidá va plantegándonos l’autora neoyorquina son los estragos que, esi comportamientu pedófilu del profesor, va causando en tolo que lu rodea: alumnes, families, sociedá. Una conducta que remueve la basa, los cimientos de la escuela y de la ciudá. Carol Oates cuenta con crudeza dalgunes escenes por boca del mesmu interesáu, y tamién de magar les voces de los que fueron los compañeros y amigos d’elli. Y sobre too, ye capaz tamién de da-yos voz a les neñes que lu traten y almiren, nun exerciciu lliterariu d’enorme dificultá. Un mosaicu de personaxes perbién dibuxaos que formen una historia dura, bien contada, que te produz repulsa pero, al tiempu, nun puedes dexar de lleer. El final ye mui guapu y caltién la complexidá de la obra d’esta gran escritora, que a los sos 86 años ye a danos una obra enllena de fuercia temática y narrativa que l’asitia n’un de los cumales de los escritores d’hoi. «El señor Fox» ye una gran novela anque, yá ta dicho, non pa tolos estómagos.
