Anque lleva yá un tiempín escribiendo, la fama llegó-y a Sergio del Molino con «Los alemanes», una novela que fue Premiu Alfaguara 2024 y que cuenta la historia d’un grupu d’alemanes que lleguen a España fuxendo de la Primer Guerra Mundial, afincándose nel nuestru país y formando una especie de «colonia». Nun la lleí, o seya que lo que digo ye «solapismu», lo que nos pon la editorial.
La que sí lleí fue esta que reseño agora y que lleva por títulu «La hija». Esa fía del títulu ye, na menos, que la fía de Goya y hai que dicilo con tolos reparos esixíos porque trátase d’una fía non reconocida. L’autor cree a cencielles que ye asina y d’esi mou na historia que nos cuenta apaecen Leocadia, la considerada «ama de llaves» de Goya, cola que vivió unos cuantos años, y la so fía Rosario, que pasó a la historia del arte, anque nun seya del too conocida, col nome de Rosario Weiss, y dambes consideraes -repito, pol autor- como la segunda muyer de don Francisco y la so fía, respeutivamente. Llueu ta Javier, fíu anterior de Josefa Bayeu, que tamién apaez pela historia y non muy bien tratáu como paez que fue na realidá.
«La hija» céntrase, fundamentalmente, nos años que los tres (Goya, Leocadia y Rosario) pasaron en Burdeos como exiliaos lliberales, fuxíos de la persecución que’l gran «felón» (Fernando VII) entamó escontra los lliberales, cola ayuda de los franceses, depués de tener xurada la Constitución. Ye una novela mui guapa, mui bien escrita y con una plasmosa documentación emplegada pero de mou tan entreteníu que nun hai llugar pa dase cuenta de que tán informándonos, al tiempu que la historia avanza. Yo nun sé si, como diz Sergio del Molino, «Mariquita» (como llamaben familiarmente a Rosario) fue fía de Goya o non, pero seguro qu’ésti fue un tutor que fizo xeres de padre y de maestru, pues enseñó-y, de bien neña, l’oficiu y dexóla collaborar en coses que facía. Mesmamente nel últimu cuadru que pintó, «La lechera de Burdeos», paez qu’hubo una influyencia de la so moza afiada.
Al tiempu, y dientro la «pequeña» historia de los Goya y la so vida y trabayu en Burdeos, ta la gran historia d’España d’esos años que fai como marcu a la otra. Pero un marcu mui entreteníu, que t’asitia l’aición que se desendolca dientro d’un contestu más ampliu, pa que s’entienda meyor. Apaecen personaxes famosos, como Leandro Fernández de Moratín, intimísimu amigu de don Francisco y home cargáu de bon humor, o l’asturianu Agustín Argüelles, «el Divino», al que Sergio del Molino pon peles ñubes, como nun podía ser d’otra manera dada la importancia histórica del nuestru paisanu. La novela esnízase, pasando pola muerte del maestru, la espulsión y l’abandonu per parte de Javier, el fíu de Goya, de la muyer y la «hermanastra», y cómo fue la so vida en Madrid cuando regresaron d’esi exiliu borgoñón onde delles fuelgues dexaron, sobre too Rosario, que tien ellí, nel Muséu de Belles Artes, unos cuantos dibuxos y litografíes..
Lo que pasa ye que l’escritor madrilanu tiénnos una sorpresa y, en llugar d’un solu llibru, ufiértanos dos pol mesmu preciu. La novela de «La hija» ocupa unes 270 páxines de la edición dixital y el restu, hasta más de 500, ye un llamáu «Manuscritu encontrado de Sergio del Molino» (o seya, l’autor) que ye un verdaderu ensayu sobre’l tema. Sobre’l tema de Goya, de la so muyer y la fía, de la monarquía, de les guerres carlistes, del lliberalismu… Nesti ensayu l’autor da cuenta de tola bibliografía de lo que trata, con la decencia moral de contraponer les tesis que lu contradicen con otres que lu sofiten, nel tema de la paternidá de Goya. Pero nun hai que pensar que too ello resulte aburrío o demasiao «culto», tolo contrario, esti Manuscritu lléese como otra novela qu’amiesta conocimientu con entretenimientu. De mou tal que nun tengo más que recomendar esti llibru, o estos dos llibros, cola seguridá de que naide que s’avere a ellos va aburrise o, esa tentación que nos entra dacuando, saltar unes cuantes páxines pa retomar la historia más alantre. A min tiénme pasao: esti nun ye’l casu. Probáilo.
