El pieslle definitivu de dos emblemátiques llibreríes, especializaes en llibros en llingua asturiana, la de Trabe n’Uviéu y la d’Alborá en Xixón, suponen un duru güelpe al espardimientu de la lliteratura n’asturianu y dexen práuticamente estrangulada la venta de llibros al públicu llector.
Ye un vieyu mal de la nuestra lliteratura, y asina lo tengo dicho en munches ocasiones, tolo rellacionao cola distribución y venta del nuestru productu cultural. Si cada vegada hai más escritores y los qu’hai escriben meyor; si los dibuxantes van algamando un altor homologable colos meyores del estáu; si el trabayu editorial (diseñu, portada, maquetación…) cada vuelta ye más profesional; si les subvenciones de l’alministración y los premios siguen calteniéndose… ¿qué ye lo que falla? Pues falla que, esi productu nel que cada vez gastamos más enerxíes y más perres, nun acaba de llegar al so destinatariu, al oxetu de tou esi esfuerzu: a los llectores. Paez como si, fechu’l gran trabayu de terminar un llibru, lo demás nun interesase. Diéremos el trabayu por fináu. Pero nun ye asina. Eso, por sí solo, nun tien nengún xacíu. Los llibros tán fechos pa ser lleídos, que ye’l so fin. Y pa poder lleelos tienen de llegar en bones condiciones al posible llector. Eso quier dicir qu’hai qu’afitar dellos puntos de venta onde poder mercalos, porque ye sabío que les llibreríes tradicionales, a nun ser delles esceiciones, nun tienen interés dalgún nel llibru n’asturianu. Si lu reciben, tiénenlu arrequexáu en dalgún llugar cuasi invisible. Hai, pues, que se plantegar cómo se ponen esos llibros que tantu trabayu cuesta confeicionar, al algame de la xente. Per un llau,
claro, tienen que tar presentes en toles biblioteques, públiques y escolares. L’alministración tien que velar porque seya asina. Y velar, tamién, nun solo porque tean, sinón porque tean en sitiu visible, bien organizaos y de fácil consulta. Nun abasta con dar perres, hai que curiar el productu porque sinón son perres tiraes. Y habrá qu’abordar el tema de les llibreríes. Agora, col pieslle d’estes dos tan emblemátiques, mui poques son les que tienen enfotu na venta de la nuestra lliteratura y, ensin esa venta, ensin el conocimientu de lo que se fai, el futuru ye imposible. Sedrán too esfuerzos esbayaos. Asina que tendrán que se sentar tolos estamentos que formen la cadena (escritores, editores, distribuidores, bibliotecarios, llibreros y la propia alministración) y ver, mui en serio, cómo pue iguase esti tema tan espinosu. Igual con dalgún tipu d’axudes, desgravaciones, etc. Como meyor seya. Cualquier cosa menos cruciase de brazos y siguir asistiendo al estrangulamientu de los llibros n’asturianu. Si nun se fai dalgo, val más zarrar el «negociu».
