Cuando entamé a lleer esta novela conocía dalgunes coses de la biografía del autor. Poeta premiáu, ensayista, finu estilista de la polémica (tuvo encontronazos con xente diverso, la cabera col Presidente de la RAE) y home d’izquierdes. Dende va unos cuantos años direutor del Institutu Cervantes. Pero, amás d’ello, García Montero formó un prestosísimu tandem con Almudena Grandes hasta la prematura muerte d’ésta. Dambos fueron un exemplu de llucha escontra la ultraderecha y en favor de les causes de los más desfavorecidos. Per otru llau, Luis García Montero fue siempre un gran amigu d’Asturies y los asturianos (de los fachas non, claro) y un defensor de la nuestra llingua en tolos foros nos que tuvo, que nun fueron pocos.
Nun conocía pa nada la so faceta de novelista, asina que principié la llectura d’ésta, recién publicada, con interés. Tengo de dicir, pa ser sinceru, que les primeres 60 páxines defraudáronme un poco. Yeren una especie de «Conversación en la Catedral», de Vargas Llosa, pero ensin la finura narrativa del peruanu. Pero fue de magar el capítulu cuartu, nel que’l narrador y protagonista refierse a una biblia que-y regalaron na cárcel, cuando la novela alcuentra’l tonu y llevanta’l vuelu. Un tonu que se caltién hasta’l final pese a delles partes que resulten un migayín repetitives.
La historia va d’un rapaz que comete un pequeñu delitu y un xuez, tamién primerizu, lu condena a la cárcel anque les prebes nun esistíen o yeren escases. Munchos años depués y yá xubiláu, el xuez de la condena, Zaldivar, atopa por casualidá nuna llimpieza na so casa, el fallu d’aquel procesu nel que condenó a Manuel Benítez ensin prebes y decide buscalu pa… nun se sabe bien qué: disculpase, pidir perdón, enterase de qué fue de la so vida… Asina averigua que Manuel tien un bar de comides, Los Claveles, y hasta ellí va pa presentase-y al que d’aquella fuere un rapaz de venti años y agora yá ye un vieyu como elli. De les conversaciones de los dos antiguos conocíos, surde esta «La mejor edad», que firma y autentifica Luis García Montero.
Pero esto ye namás el principiu porque, bien ceo, el señor xuez pasa a un segundu llugar y la novela vien a centrase en Manuel. Esi rapaz que fue a la carcel, que pasó ellí un par d’años y que se namoró (y ella d’él) de la so abogada defensora, Paula, una bona rapaza, lluchadora, comprometida y d’izquierdes, que lu espera a la salida, acuéyelu na so casa y entama una vida con elli. Una vida que va pasar por munches etapes, dende un amor mui prestosu, hasta caídes y recaídes d’un y otra, pero que van componiendo un mosaicu vital mui guapu. Eso ye, en definitiva, el migoyu de la historia: la rellación de Manuel y Paula. L’amor que se tienen, que pierden, que recuperen… Y nes páxines de la novela hai, amás d’amor, perdón, arrepentimientu, envidies, duldes, desprendimientu, enfermedá… Y llégase a una parte final onde, otra vuelta, el señor xuez va xugar un papel importante na vida de Manuel. Pero eso ye dalgo que’l llector tendrá qu’averiguar por sí mesmu.
Una bona novela, en resume, un aquello repetitiva, pero que siempre interesa sobre too pol llinguax reflesivu qu’emplega l’autor, que pasa de lo intimista y trescendental a lo simpático y popular. Nun se me ficieron llargues les cuasi trescientes páxines del llibru. Eso ye una bona señal.
