Tamos asistiendo al surdimientu d’un grupu d’espléndides escritores femenines de l’América del Sur. Con un estilu mui propiu, anque nada nun tengan que ver unes con otres, sí podemos atopar una forma distinta de contar. ¿Distinta de quién? Pues distinta de les europées y, sobre too, de les españoles. Nun quiero meteme en fondes disquisiciones, nin a citar a ganadores d’esti o aquel premiu (dalgunos mui manipulaos), pero peme que tol mundu s’apauta en qu’hai una narrativa un poco cursi -tamién de paisanos- que paez falar de coses que nun vivió y que sintió d’oyíes. A vegaes yá repuna hasta’l propiu títulu, acarameláu y rebuscáu.
Por en cambiu, lleo agora una novela de la escritora colombiana Pilar Quintana (Cali, 1972), de la que namás sé que ganó’l premiu de novela Alfaguara (l’autora, non la novela) y que, amás, tien un nome bien asturianu pero que, arriendes de lo lleído, voi procurar siguir de cerca. Y digo esto porque «Noche negra» ye una mui interesante novela.
La protagonista, Rosa, ye la única voz que se siente a lo llargo la historia. Una historia que principia con ella, una mulata d’orixe modestu, fía ilexítima d’un mélicu, pero que cursó estudios universitarios y que, nel momentu en qu’entama la novela, ta asitiada nun pueblu remotu de la selva colombiana. La ciudá que ta mas cerque, Cali, queda mui lloñe, y ella tien qu’aguantar la soledá y los rigores de la selva, sobreviviendo n’unes condiciones que nengún de nosotros soportaríemos.
Rosa nun llegó sola hasta esi requexu del mundu, pero la so pareya, Gene, depués d’un tiempu de compartir trabayos y penalidaes pa llevantar una casa, marcha, supónse que temporalmente, a iguar unos papeles que necesita pa llegalizar la so situación alministrativa. Ella queda ellí, guardando’l territoriu, no alto d’un cantil, separtada del pueblu de cuatro cases de pescadores y una minúscula tienda d’aperios que ye la única que tien teléfonu pa coneutase col mundu.
Nesa solitú, onde los animales y la propia vexetación siéntense como enemigos, la novela sigui los pasos diarios de Rosa, con detalle, con frases curties que, dacuando, mecien la propia realidá colos recuerdos, los suaños y les velées que l’ataquen ensin aparar. Pa más aquello, pellí anden unos vecinos que, al saber que ta sola, ronden la casa con non bones intenciones, o polo menos ye lo qu’ella sospecha. Y xunto a ello, rúxese que tamién habiten lo más fondo de la viesca unos nativos con gana de vengase de lo que podíemos llamar «la civilización», y que dexen un rastru sangrientu pela zona. La lluna nueva ta viniendo y con ella la escuridá ye entovía más fonda. ¿Cómo aguantará la protagonista esa soledá tan enllena de pelligros? Eso ye lo que Pilar Quintana nos cuenta, con una prosa concisa, apertada, que fuxe de la poesía anque ésta surde de la propia cenciellez. Paga la pena conocer esta voz nueva que nos llega dende la gran Sudamérica, a xunise con otres voces que, cada vuelta más, van formando un coru que pidi pasu nel mundu lliterariu d’anguaño.
