Hai yá munchos años que soi «forofu» de Rafael Álvarez «El Brujo». Abúltame que dende que vi, allá pel final de los años 80, aquella serie de «Juncal» que protagonizaba de mou maxistral Paco Rabal y na que «El Brujo» facía’l papel del llimpiabotes «Búfalo». Nun sé si tendría trabayos anteriores, pero aquella serie fue la que-y abrió la puerta grande de los actores. Depués d’eso munches coses importantes, cuasi dafechamente en teatru y, davezu, con monólogos él solu delantre’l públicu. Recuerdo, asina penriba, «El lazarillo de Tormes», «Don ¨Quijote» o «El evangelio de San Juan», ente otros munchos d’ésitu total.
Vieno agora al Filarmónica d’Uviéu a danos la so peculiar güeyada de «La Odisea», nun espectáculu que, como suel pasar, enllenó’l teatru hasta arriba. La pallabra fue suya, durante les cuasi dos hores que duró la representación, namás acompañáu per un triu de percusión y cuerda que remarcaben, con una música de calter mediterraniu, dellos pasaxes de la obra. Esta Odisea de «El Brujo» ye una versión mui desenfadada de la obra clásica, camudando momentos dalgo más serios con otros enllenos de gracia y sentíu del humor. Una coña qu’algama a los dioses, principiando por Zeus y l’ «allegre» Palas Atenea, y siguiendo pol Cíclope, Penélope o Telémaco. Con dicir que’l personaxe más seriu de toos fue’l del perru d’Ulises que, por cierto, ye l’únicu que lu reconoz embaxo’l so disfraz de mendigu, ta dicho too.
Pero xunto con esa «coña marinera» qu’exagua tola obra, «El Brujo» cayó, pal mio gustu, nun escesivu «populismu»
qu’amosó con numberosos chistes y bromes sobre l’actualidá española. Asina, los recursos a bromiar al rodiu de Bárcenas, Rajoy, los Bancos, o la cai Génova abultáronme fuera de tonu, anque fueren acoyíos con grandes aplausos por un públicu dafechamente entregáu dende’l momentu de la so apaición pel pasiellu de butaques, camín del escenariu. El públicu asturianu, yá lo tengo dicho n’otres ocasiones, ye un públicu demasiao facilón y «El Brujo», que nel intre s’apercibió d’ello, aprovechó pa esbarrar al marxe de la obra lo que-y dio la gana. Nun tenía menester d’ello porque yá la obra en sí da abondu xuegu pa pasalo bien.
Nun hai falta dicir que Rafael Álvarez enllena l’escenariu y nun sólo cola pallabra. La so interpretación xestual ye magnífica y muévese, salta o tírase pel suelu cola armonía d’un ballet. Vese, amás, que l’actor esfruta cola obra y que la fai suya de tal manera que, hasta cuando s’enquivoca fai d’ello un motivu de chancia. Eso pasó, por exemplu, cuando en llugar de dicir que: «… los mares se amansan…», salió-y ensin querer «…los mares se amasan…», y entamó un monólogu inventáu sobre cómo «se amasaben» los mares, hasta que finó diciendo ente rises: «Bueno, en realidá ye que me confundí…», lo que llevantó los aplausos de toos pola so gran improvisación. Resumo, entós, diciendo que me prestó la obra, na so parte más auténtica, y que refugo por innecesaries toles «morcielles» d’actualidá que nos llargó esi grandísimu actorazu que sigue siendo Rafael Álvarez «El Brujo». Espérolu pa la prósima.
