Esti miércoles, día 2, en plena Selmana de les Lletres Asturianes, vamos presentar nel Salón d’Actos del Antiguu Institutu, a eso de les 18,30 el llibru «Obres (in)completes de don Enrique García-Rendueles» (1881-1955). Trátase d’una edición na que llevo trabayando dellos años y que, por fin, depués de munches pexigueres, asoléyase agora dientro de la Coleición de l’Academia «Llibrería Facsimilar».
Rendueles fue una gran intelectual asturianu al que-y debemos una antoloxía dafechamente imprescindible na lliteratura asturiana: «Los nuevos bablistas». La «Introducción» de don Enrique qu’acompaña a l’antoloxía debiere ser d’obligada llectura nes escueles asturianes. Porque’l curina xixonés tien una visión de la so llingua y de la so lliteratura tan moderna como la nuestra, nel sen d’una llingua que pue valir pa too y nun sólo pa les coses de l’aldea como él critica a los escritores de la so dómina.
EStes son unes obres in-completes, y asina se fai figurar yá nel títulu, porque sabemos que falten el Diccionariu y la Gramática absurdamente desapaecíes nel Institutu d’Estudios Asturianos y que, pese a los múltiples intentos d’atopalos que fici, nun fui a ello. En tou casu hai nestes obres de Rendueles ensayu, crítica, biográfia, 32 poemes de creación propia y otres coses variopintes, ente elles un Vocabulariu inéditu de 1924 que ye perinteresante. Xunto con ello, nuevos datos biográficos, anéudotes y unos amiestos nos que s’inclui la trescripción notarial del testamentu ológrafu de García-Rendueles y la correspondencia que la so heriede tuvo con delles persones ya instituciones de la cultura asturiana, que nun dexen a ésta, precisamente, nun bon llugar. Tou esti material, que llevó munchu tiempu llocalizar, esbillar y clasificar, forma esti volume de más de 500 páxines que’l día 2 de mayu vamos presentar. Si pasáis pel vieyu Insitutu, ellí vos veo (si el «trancazu» que tengo me respeta), y sinón mercái’l llibru que yo creo que paga la pena.
