Nun sé si falé yá nesti blogue -que se m’escapa por momentos- de «Lupita books & cookies», un guapu proyeutu qu’axunta dos de los mios amores: los llibros y les llambiotaes nel so más ampliu conceutu. La Lupita del nome ye Lupe Rodríguez, que fue l’alma mater de dalgunes editoriales nel tema de la LLIX (Lliteratura Infantil y Xuvenil) y que, un poco farta de dependencies nun deseaes, instalóse pela so cuenta con una tienda on-line qu’igual te fala d’obres y d’autores famosos, que te da la receta d’un postre colombianu típicu de los Andes. Ye una delicia lleer dalgunes de les reseñes d’autores re-conocíos, al tiempu que salivamos con más aquello que’l perru de Paulov. Como amuesa d’ello, póngovos l’enllaz d’un de los sos artículos na yá reputada revista d’arte, lliteratura, gastronomía y otres munches coses «Baidewei». Y como un (o seya yo) nun suel dar puntada ensin filu, aprovecho pa faceme propaganda por un cita que me fai’l citáu artículu. Conste que fue intencionao, pero lo guapo ye’l «Mister Taylor» d’Augusto Monterroso. Veréis cómo vos presta. www.bdwei.com/blog/2013/06/13/mister-taylor-de-augusto-monterroso-y-champurradas/
