Coincidiendo cola Selmana de les Lletres, como vien siendo davezu nos últimos númberos de la revista, acaba d’asoleyase «Lliteratura» publicáu pola Academia de la Llingua Asturiana. Les ilustraciones y el diseñu corrieren a cargu de Marcos Martínez Fernandez «Indelendo». Trátase, seguro, d’un bon diseñu, anque a min paezme, sobre too la portada, un poco «sucia», nel sen de que-y falta claridá y atrautivo anque quiera caltener los tonos azulete de la orixinal. Pero eso son opiniones d’un non espertu, igual esi yera l’efeutu que quería llograse. Tampoco nun me prestó muncho que en páxines interiores se falara del primer númberu de la revista, a la que se fai un homenaxe, como «humilde», cuando me paez que nunca hasta entós, por nun dicir hasta agora, hubo una revista cultural n’asturianu más curiosa, elegante y moderna qu’aquel primer númberu diseñáu por Jorge Fernández León.
L’interior de «Lliteratura-38» recueye una amuesa de práuticamente tolo que ta escribiéndose nestos momentos n’asturianu. Yo diría que resulta hasta un poco «abigarráu». Asina, xunto con un xustu y obligáu recordatoriu de Xose Bolado, gran amigu y primer direutor de la revista, hai un apartáu empobináu a los Microrrellatos onde se recueyen na menos que 46 cuentinos de toa clas d’autores asitiaos por orde d’edá. Suerte pa min porque resulta qu’asina soi’l primeru. Dientro d’esta riestra de microrrellatos hailos de toa frasca argumental y de calidá, anque la media ye, al mio xuiciu, interesante.
Hai, depués, una estaya de poesía onde figuren Alfredo Garay y Noemí González, dos bonos poetes, y l’anticipu d’una novela de David Artime, «Cróniques d’un machista feminazi», que nos ufierta un de los sos prósimos capítulos. Paquita Suárez Coalla, asturiana residente en Nueva York, fala de «Lliteratura neoyorquina con acentu asturianu» que cuenta como fue’l so averamientu a la lliteratura asturiana y los primeros pasos qu’ella dio nesi sen. Depués d’esti pequeñu ensayu hai na revista un llargu apartáu de Crítiques de llibros, encabezáu por un rápidu «Panorama lliterariu de 2021», de Marta Mori. Una especie d’escaparate onde figuren los llibros espublizaos a lo llargo’l periodu, clasificaos por xéneros. Siguío d’ello vien la reseña de, hasta trece llibros, comentaos por estremaos autores que nos averen a la obra de dalgunes d’eses publicaciones de recién, apartáu siempre interesante. Pa lo cabero queda l’homenaxe a Xose Bolado, «in memorian», a cargu de Paz Fonticiella, Alejandro Fernández-Osorio, Cheni Uría y Jordi Doce. Un nuevu númberu de Lliteratura que, como puede vese pola so estensión, tendrános lleendo bona lliteratura a lo llargo tol añu.
