Gilbert Bordes ye un escritor francés, poco conocíu n’España anque polo visto premiáu nel so país. Yo non lu conocía. D’esta novela prestóme’l títulu, «Los niños del invierno», y allégrome de dedica-y unos díes a la so llectura. La historia cuenta les peripecies de seis neños, los mayores yá adolescentes, a los qu’unos guíes de la resistencia francesa traten de pasar a España a traviés de los Pirineos. Los guíes son asesinaos poles SS y los neños, que taben escondíos nuna cueva, tienen que se les arreglar pa sobrevivir al fríu, a los llobos y a la falta alimentos. Son cuarenta y tantos díes, a capítulu por día, nos qu’asistimos a la llucha pola vida d’unos chavales (neños y neñes) que tienen de deprender sobre la marcha lo qu’otros de la so edá tarden años en facer. Ente ellos hailos fíos de comunistes y de burgueses, de xudíos y de cristianos, pero toos tienen que collaborar porque-yos va la vida nello. Hai tamién dalgunos amoríos, pues los mayores ya tienen edá pa ello, y a momentos d’allegría cuando tienen pequeños llogros, siguen otros de desesperu cuando les circunstancies los superen.
Ye mui interesante’l ver cómo faen frente a cada peligru y, sobre too, a la necesidá de caltener el fueu siempre encesu, talo que-yos pasaba a los humanos primitivos colos que tienen munches semeyances. Son una especie de «robinsones», pero nun inhóspitu paisaxe d’alta montaña. Novela, pues, pa tolos públicos pero que yo recomendaría dafechamente pa rapazos cola seguridá de que diba a presta-yos, pese a que tenga delles escenes un poco dures. Habra que tar atentos al autor.
«Los niños del invierno»
Gilbert Bordes
Ediciones B
2010
