Nel austeru patiu de columnes del palaciu Conde de Toreno, cellebróse esti vienres la entrega de los Premios del Principáu 2015. Asistió munchísima xente -les sielles taben toes ocupaes- y presidió l’actu el Conseyeru d’Educación y Cultura Xenaro Alonso Mejido. Hubo tamién representación de l’Academia de la Llingua, de la Universidá y de la vida política y social, dende l’alcalde de Cabranes, hasta xente d’Izquierda Xunida y Podemos. Igual había de más partíos, pero a esos nin los conocía nin se dieron a conocer. Por supuesto, muncha xente de la cultura asturiana y amigos escritores. Presentó l’actu la guapísima, intelixente y espléndida escritora Vanessa Gutierrez que, como siempre, tuvo mui acertada na conducción cola suavidá que-y ye reconocida.
Los premiaos, nel mesmu orde en que se fallaron los premios, xubimos a recoyer el troféu -una guapa cerámica
personalizada- y a dicir unes pallabres. Ruma tuvo, como siempre, ocurrente y fízonos reir a costa del premiu en metálicu. Xubí yo detrás, pa dar les gracies al xuráu que falló’l premiu, desplicar lo arguyosu que taba de llevar conmigo el nome de la Ilustre Maria Xosefa Canellada, falar un poco de la obra premiada y aprovechar pa xuntar la mio voz a la del Conseyu d’Europa na petición a les autoridaes asturianes de la Oficialidá pa la nuestra llingua. José Ángel Gayol, faló, fundamentalmente, de la obra ganadora del premiu d’Ensayu, desplicando en qué consistía. Antón García, mui bien como siempre, amestó a la petición d’Oficialidá otres reivindicaciones más profesionales. Y Paco Álvarez, tamién mui ocurrente -xubió al estráu con ocho folios… en blanco, pa facer «atrezzo»- agradeció a tolos que lu axudaron a escribir y lu alendaron nestos tiempos difíciles. Zarró l’actu’l Conseyeru Alonso Mejido, con unes pallabres n’asturianu mui guapes y señaldoses, enfotáu tamién en que lo que meyor pue facese cola llingua ye oficializala. Fue mui aplaudíu.
Como acompañamientu musical tuvieron la poderosa cantante de tonada Anabel Santiago y, a la guitarra, el escelente escritor y guitarrista Xuliu Arbesú, autor de la mui interesante novela «Potestas«. Cantaron cinco canciones, tamién mui aplaudíes. A min prestóme sobremanera «El xilguerín parleru«, del Presi, porque siempre la sentía cantar a mio padre cuando taba contentu o cuando s’afaitaba, y la versión d’Anabel púnxome tou respigáu. Y asina finó esta nueva edición de los premios, ente la cultura, l’amistá y la reivindicación. Como tien que ser.
