«María y yo» ye un guapísimu llibru del recién fallecíu Miguel Gallardo. Esti autor catalán destacó nel mundu de la historieta siendo, polos años 80, el creador de «Makoki», un antihéroe radical escapáu d’un manicomiu y que necesita «chutes» de lletricidá pa siguir furrulando. Una especie de lletroshock de bolsiellu. Gallardo tien otros munchos personaxes creaos y trabayó en revistes como El Vívora, Cairo, Viñetas y otres.
Tráigolu güei equí por dos motivos. Un porque morrió’l pasáu mes de febreru, con 66 años, y petecíame homenaxealu de dalgún mou, y otru porque acabo lleer la guapísima historia que cuenta en «María y yo»: un viaxe de vacaciones a Canaries cola so fía que ye autista. Como tolos llectores d’esti modestu blogue saben (o deberíen saber) yo escribí un llibru sobre un neñu autista llamáu Héctor, nel album «Páxines del diariu de Simón». La so versión en castellán tuvo bastante ésitu, saliendo recomendáu por distintos medios ya instituciones, conociendo tornes al catalán y al xaponés. Quiero dicir con esto que tengo un ciertu averamientu al mundu del TEA (Trastornu del espectru autista) y por eso interesóme muncho esti llibru y la forma como ta contáu.
María ye una neña de 12 años y ye única. Como somos toos… pero especial. Sí yá sé que tamién toos somos especiales, como diz un personaxe del mio llibru, pero ella ye «mui» especial. Miguel Gallardo cuéntanos, con un llinguax cenciellu y el sofitu impagable de los sos dibuxos, el detalle d’esos pocos díes que pasa de vacaciones cola so fía. Ella vive con so madre, en Canaries, mentanto el padre vive y trabaya en Barcelona. Lo bueno que tien el llibru ye que so padre nun escuende nada de la neña. Nada d’almibarismos o mitificaciones. Miguel diznos con naturalidá cuales son les sos peculiaridaes, tanto les buenes como les non tan buenes. La so zuna polos nomes, poles clasificaciones, poles repeticiones… Fálanos del so mundu aislláu, del que nun sabemos muncho, y de los momentos en que lu comparte con nosotros, y la gran allegría qu’eso nos produz. Y asina mesmo fálanos del comportamientu de la xente que l’arrodia, la qu’empatiza con ella y a la que-y molesta, a la que cafia. Ye difícil convivir con una neña con autismu, pero tamién tien munches compensaciones. Partiendo siempre dende’l cariñu, claro. La historia tien una segunda parte que lleva por títulu «María cumple 20 años» y qu’entovía nun lleí, pero que de xuro lleeré. Porque me prestó muncho esti llibru-guión del comportamientu d’una neña «especial», vista dende los güeyos d’un padre cariñosu pero oxetivu. Recomiéndovoslu.
