Va unos díes morrió na ciudá de Vigo, al filu de los setenta años, l’escritor gallegu Agustín Fernández Paz. Yera un de los más destacaos del piñu de bonos escritores de Lliteratura Infantil y Xuvenil que tien el vecinu país: Docampo, Casalderrey, Martín…
Fernández Paz fue co-fundador de los coleutivos pedagóxicos “Avantar” y “Nova Escola Galega”. Impartió numberosos cursos rellacionados cola didáutica de la llingua, la normalización llingüística y los medios de comunicación, y collaboró en abondes revistas sobre esos mesmos temes. Fue tamién coautor de materiales didáuticos, empobinaos al adeprendimientu de la llingua. Fizo crítica de LLIX y como escritor ganó importantes premios, como el Lazarillo, el Edebé Xuvenil o el Barcu de Vapor.
La editorial Trabe tien publicáu n’asturianu, precisamente, el llibru ganador del Lazarillo, Cuentos por palabres, en torna de Esther Castro y dibuxos de Carmen Peña. Fue nel añu 1993 na so coleición Montesín. Nel añu 2008 algamó’l Premio Nacional de Literatura Infantil y Juvenil por su obra O único que queda é o amor, editáu por Xerais. Descanse en paz l’escritor y bona persona Agustín Fernández Paz.
