¡Qué bon llabor ye’l descubrimientu, por parte los investigadores, de nuevos escritores en llingua asturiana de dómines pasaes! Y más si son muyeres. Non por nengún «feminismu militante», sinón porque, depués d’años de tapecimientu o inorancia nos que mui poques femes pasaron a la nuestra historia lliteraria, agora van apaeciendo nomes que nun conocíemos, o si se conocíen, sabíase poco d’elles. Esos son los casos de Teresa Consul, de la que sonaba namás el nome (pesie a qu’Álvaro Ruiz de la Peña yá la citare va abondu tiempu), Enriqueta González Rubín, Matilde de Soignie o Josefina Alonso Álvarez (de la que tengo yo escrito na revista «Lletres asturianes»), ente otres más, de les qu’agora conocemos dalgo d’elles y de la so obra.
Poro, aprovecho pa felicitar a l’Academia de la Llingua, de la que soi partícipe anque yá nun tea na «trinchera», por tener algamao’l númberu 99 de la revista «Cartafueyos de Lliteratura Escaecida». Una coleición que destapeció a munchos autores en llingua asturiana y de los yá conocíos, a parte de la so obra qu’andaba perdida.
Nesti númberu 99 dásenos cuenta d’una autora de la que nun teníemos anuncia y que se llama Paulina Ciaño. La edición del cartafueyu, la introducción y les notes son d’Ivan Cuevas que nos ufierta una completísima biografía de l’autora, daes les escases referencies qu’había d’ella, y amiesta dos de les obres de la so autoría (de la de Paulina).
Paulina Ciaño yera natural del barriu La Oliva, en La Villa, y naciere n’avientu del 1869. Fía del llangreanu Tomás García-Ciaño y Fernández-Nespral, de Blimea, y de la villaviciosina Paulina del Canto y la Busta. Fuere la novena de trece hermanos. Yá de mocina, emigra pa L’Habana, tres de dalgún de los sos hermanos, onde trabayó de mayestra. Muyer viaxera, viaxó y vivió en Nueva York onde tamién punxo clase, y tiempu depués instálase en Santu Domingu pa dirixir unes escavaciones arqueolóxiques. Ellí funda la Casa de España en 1917. Fina la so vida en Puertu Ricu el 1 de setiembre del 1926 a los cincuenta y siete años.
Muyer independiente, nun llegó a casase, y yera d’ideoloxía mui conservadora y ultracatólica. Según nos cuenta Ivan Cuevas, tenía un carauter mui enérxicu, amplia cultura y gran talentu, como demostró n’estremaes materies amás de la lliteratura, como l’arqueoloxía, la música y el dibuxu. Yera trillingüe (asturianu, castellán ya inglés) y collaboró en diversos periódicos y revistes asturianes, norteamericanes o cubanes, ente elles nel «Diariu de la Marina», onde publicaría poesíes, columnes y artículos de viaxes.
Cuevas dános cuenta de tres obres de teatru suyes escrites n’asturianu: «La vuelta del indiano», «La medecina de Xuan», y «Esfoyón», que paez que se representaron con ésitu nos Estaos Xuníos. De la primera nun queda rastru, y la segunda ye la que vien recoyida nesti Cartafueyu de l’Academia, xunto cola parte final d’ «Esfoyón» que nel so día se publicare nel diariu «Región» en 1924. En cuantes a la fecha d’edición, nun ta mui clara. Ivan Cuevas aventura, por detalles que recueye na «Introducción», que debio ser ente 1920 y 1924. Ye interesante, en tou casu, la llectura dafechu del cartafueyu pa enterase de les andances de l’autora de La Villa y del propiu manuscritu, más entá sabiendo qu’esti trabayu algamó’l primer premiu del Concursu «Xosé Bolado» de recoyida de material lliterariu inéditu, anterior a 1970.
Vamos poner una pequeña amuesa d’un de los diálogos de la obra que, amás, vien mui a cuentu de lo que tamos viviendo agora:
Benito: «Hables mesmamente como un llibru. En cuantu se acerquen les eleciones, el señor cura y el amu pónense como la seda: pregúntenme pola muyer y los fíos, el amu promete rebajar la renta, quitar les goteres, mandar los rapazes a la escuela… Y en cuanto votaste, el amu vuélvese un grifu y el señor cura mándate dir a confesar.»
Bienllegáu, entós, esti cartafueyu qu’enancha l’indiz de muyeres que falaron y escribieron n’asturianu, y quedemos a la espera de nueves investigaciones qu’aporten entovía más valir a la lliteratura asturiana.



