close
Recordatoriu

Recordatoriu

2016-05-20Xaviel Vilareyo584Visitas

Recordatoriu Xaviel VilareyoCúmplese estos díes un añu del fallecimientu del escritor miérense Xaviel Vilareyo a la temprana edá de 48 años. Un piñu d’amigos y amigues, al rodiu del Grupu Epona, ficieron un actu d’homenaxe y recordatoriu al polivalente asturianista. Vilareyo cultivó la poesía, el teatru, l’ensayu, la narrativa y la música escribiendo, amás, tanto n’asturianu como n’eonaviego. Xunto a ello organizó otros entamos como xuntes d’escritores o’l mesmu Festival del Cine Asturianu que, dende qu’él lo dexó, nun volvió a convocase.

L’actu d’homenaxe fízose nel Salón d’Actos de la Caxa Rural d’Asturies, embaxo la presidencia d’Helena Trexu, Inaciu Galán y Xuan Pandiella. Anque fuimos poca xente, la cosa resultó emotiva, cuntándose delles anéudotes del escritor fallecíu y finando con una llectura de poemes nes dos llingües nel que polifacéticu escritor s’espresaba. Al paecer los sos heriedes tienen dalgunos materiales inéditos que nun taría mal publicar porque, a fin de cuentes, un nun muerre del too cuando dexa tres de sí obra escrita. Un abrazu pa la familia.