Ye, claro, el rapaz protagonista de “Páxines del diariu de Simón”/”Páginas del diario de Simón”. Primero fue’l figurar na llista de la prestixosa revista CLIJ, ente los 10 meyores llibros del añu pa la so edá, amás na so edición n’asturianu que tien más méritu, al llau del castellán y les otres llingües peninsulares. Depués fue la compra de los derechos por una editorial catalana -«Edicions Saloria»– pa publicalu en catalán y esti mesmu día la seleición por parte de la «Fundación Cuatro Gatos» ente la so llista de los 100 meyores llibros en castellán d’Iberoamérica y Estaos Xunios.
La «Fundación Cuatro Gatos» ye una organización ensin ánimu de beneficios asitiada n’Estaos Xuníos y que los sos oxetivos son la investigación y l’estudiu de la produición editorial n’español, empobinada a llectores infantiles y xuveniles. Pa ello cunta col asesoramientu de pedagogos, maestros, filólogos, sicólogos y xente del rodiu de la LLIX. L’apaecer na so llista ye como una marca de garantía de calidá, dientro d’esi mundu editorial. Esti añu la escoyeta fue ente 1194 llibros, asoleyaos por 182 editoriales de 16 paises. Los países más representaos nos premios fueron Arxentina, Chile, Colombia, España y México.
El fechu que dende esti requexu del mundu que ye Asturies, seamos a competir en calidá lliteraria y editorial coles grandes empreses del mundu hispanu ye pa min, como parte del equipu que fizo’l llibru (la ilustradora Inés Sánchez Nadal y la Editorial Pintar-Pintar) un motivu d’arguyu y de gayola. Asina que ¡Gracies, Simón!
