Nun sabía qu’había una coleición lliteraria que llevaba’l nome de «Panenka». Un xugador de fútbol checoslovacu que dio nome a un estilu particular de tirar los penales. Suavino y al centru aprovechando que’l porteru se tirare pa un de los llaos. Un modelu mui «cabritu» pues siempre dexa al guardameta con cara fatu y bastante mala llechi. «Panenka» ye una revista que tamién edita llibros, supongo que del so tema, o seya’l balompié.
El casu ye que lleí un d’esos llibros de la coleición, que lleva por títulu «Streltsov, un futbolista nel gulag». Pa dicir la verdá, lo que me ganó pa la llectura fue eso del gulag, porque sonábame a oposición al Réxime, a deportista políticu que s’enfrenta al gobiernu siendo por ello represaliáu. Una especie de Navalni en pantalón curtiu. La verdá ye que nun hai muncho d’ello, pues el motivu pol que’l futbolista del Torpedo de Moscú fue a la cárcel fue pola violación d’una moza tres d’una nueche de xuerga. Na novela, ensin desmentilo del too, pon un poco en dulda esa versión porque les autoridaes soviétiques teníenlu atravesáu. Yera bebedor y bastante xuerguista, lo que non cuadraba mui bien col espíritu del home soviéticu que queríen promocionar. Y amás teníen mieu que, con esa forma de ser, pudiere desertar nuna de les salides que facíen al estranxeru. Asina que-y prepararon una especie d’ «encerrona».
Streltsov fízose famosu en mui pocu tiempu. Con 17 años ya xugaba nel fútbol profesional y yera un delanteru centru con mui bona planta y goleador. Altu, rubiu, guapu… la xente lu adoraba, pero la so vida personal nun yera mui bon exemplu. Taba nel zenit de la so carrera cuando tuvo «l’incidente» de la violación lo que lu torgó p’asistir al Mundial de Suecia. Ellí debutaba con Brasil un tal Pelé, con 17 añinos, y la seleición carioca desllumó quedando campeona. Él quedóse col nomatu d’ «el Pelé blancu».
La novela, escrita pol periodista inglés Jonathan Wilson, especializáu en temes de fútbol, va siguiendo los pasos de «Edik» -como llamaben los suyos al delanteru- dende la so rellación con una madre humilde y mandona (al padre nun lu conoció) pasando polos primeros amores y aventures, too ello un poco superficialmente, porque onde más se centra la historia ye nel aspeutu futbolísticu. La voz narradora ye la d’una especie d’utilleru del Torpedo, un paisanu modestu que-y coyó munchu ciñu al rapaz, y que ye’l que va viendo, con muncha desilusión, el camín retorcíu que lleva’l chaval.
De magar el xuiciu por violación, que fue toa una escandalera pola fama de Streltsov, al xugador cayéron-y 12 años de cárcel que pasó en tres o cuatro gulags distintos, anque llueu cumplió namás cinco años mui duros. Volvió a xugar, anque los «camaradas» soviéticos nun lo queríen, pero la xente de la cai escaeció bien ceo’l motivu de la so condena y peronde quiera que diba volcábase con elli. Antes que pasare a mayores decidieron rehabilitalu. Anque nunca algamó la proyeición que llevaba, siguió siendo un bon delanteru y marcando goles. Tamién volvió a xugar cola seleición de la que fue un de los másimos goleadores.
La novela paecióme más un ensayu un poco noveláu qu’una verdadera novela, parándose en datos y estadístiques que ralenticen un poco lo que se cuenta. En cualquier casu, prestóme lleela y asina conocer a un futbolista por mí ignoráu, pero qu’ocupa un llugar mui destacáu nel firmamentu del deporte soviéticu. A los futboleros prestará-yos.
