Un cuartu de sieglu ¿ye munchu tiempu? Pues ye relativo. Si-y lo entrugamos a un Paleontólogu diranos que ye un sospiru, una nada. Si lo facemos a un historiador, yá ye un tiempu considerable: la Segunda Guerra Mundial duró poco más de cinco años. La Guerra Civil Española menos de tres, ya inclusive hubo una, ente xudíos y árabes, que duró namás seis díes.
¿Son muncho veinticinco años na vida d’una persona? Poniendo una media de vida de setenta y cinco vien a ser una tercer parte. Ye bastante.
Cúmplense esti añu los 25 del fallecimientu de María Teresa González. Pa la so familia y los sos munchos amigos ye un periodu enorme ensin ella. Pero a lo llargo de toos estos años el so recuerdu tuvo siempre presente. Un recuerdu que, amás, materializóse añu tres añu con eses flores que nun dexamos de lleva-y, y qu’Amalia siempre procuraba que fueren les más guapes.
Pa esti aniversariu, el del cuartu de sieglu, el so fíu Mauro tuvo la idea de crear una páxina web que recoyera tola so obra y lo principal de la so vida, y que pudiere descargase de baldre pa tou aquel que tuviere interesáu nello. Trátase de muncha xente, pues ye una autora que col pasu del tiempu fue revalorizándose, ya inclusive llegando a xente mozo que nun llegare a conocela personalmente.
La páxina creo que ye mui guapa ya invito, dende esti modestu blogue, a que los mios llectores (que los hai) entren nella y se muevan pelos sos distintos apartaos, cola seguridá de que-yos va a prestar el percorríu. Si yá conocen a l’autora, pa que la recuerden, y si non, pa que descubran a una escritora que, pese al cuartu de sieglu trescurríu, sigue tando ente les meyores. www.mariateresagonzalez.com
