close
Un guapísimu llibru asturianu

Un guapísimu llibru asturianu

2012-10-07539Visitas

Munches veces, ente’l baturiciu de nueves publicaciones, esa necesidá que tienen les editoriales de sacar títulu tres títulu, como mou de financiar unos llibros con otros, ente esi baturiciu, digo, escápasenos dalguna ayalga. La verdá ye que nun hai tiempu (nin perres) pa tar al día na salida de nuevos llibros, y según testimoniu de los propios llibreros, nun hai tiempu siquier p’asitialos nel escaparate. Y ye una pena porque asocede como nesti casu, que nos pasa desapercibía la publicación de dalgo dafechamente interesante.

La «Cartografía Histórica de Asturias«, de Juan Sevilla Álvarez, ye un d’esos llibros que vienen a arriquecer el panorama del llibru asturianu, tan necesitáu, per otro llau, de títulos realmente interesantes. L’oxetu del llibru ye facer un estudiu críticu de la evolución cartográfica d’Asturies, al rodiu d’una riestra de mapes seleicionaos atendiendo a dellos criterios: la fiabilidá, el so valor como documentu, la so calidá gráfica, etc. Y son, na so mayoría, mapes d’Asturies, del cuadrante noroccidental de la Península y de cartes náutiques nes que se representen les costes del Mar Cantábricu.

Parte esti estudiu de la Geographia de  Ptolomeo, sigue peles Tabulae Novae de la escuela italiana del sieglu XVI, continúa pelos mapes flamencos y holandeses del noroeste peninsular, sieglos XVI-XVIII, dando pasu, llueu, a les cartografíes de los Austrias, de la escuela francesa del XVIII, hasta aportar a los sieglos XIX y XX. A la fin, fálase del orixe de la cartografía temática d’Asturies y de diverses aplicaciones de la mesma (comunicaciones, comerciu, llingua…)

El llibru vien prologáu pol Caderalgu Eméritu de la Universidá d’Uviéu, don Francisco Quirós Linares, reputáu xeógrafu y autor de bien de trabayos d’investigación sobre la xeografía asturiana, con semeyes de Enrique G. Cárdenas. Y ta primorosamente editáu pela editorial asturiana «Saltadera», que dirixe Antón García. Agora que s’alleguen les Navidaes, sedría un momentu mui afayaízu pa mercar esti llibru que, aparte del so importante valor intrínsecu, ye un oxetu perguapu como regalu. Tamién n’Asturies somos a facer coses dignes.